第九集《我愛發哥》昨日在《東網巨星》播出，人氣歌手許廷鏗（Alfred）向男神周潤發請教如何增強親和力，發哥細心施教，叫Alfred當正觀眾是老闆及親戚，一定冇衰！

許廷鏗

發哥自言着重觀眾感受，更視之為米飯班主，令許廷鏗獲益良多。

發哥詳細教路，許廷鏗邊聽邊會心微笑。

Alfred ：點解你會咁願意同其他朋友自拍，你覺得咁樣可以增加親和力？抑或真係好鍾意同人影相呢？

發哥 ：某程度上，去到依家我呢個年齡，睇我嘅人分分鐘呢……我入行時17、18歲，睇我嘅人可能佢係仔，由電視電影睇住呢個哥哥幾十年，有日喺街撞到，嘩！佢真係會癲咗！畀着我都會癲咗，如果我唔同佢影番張相，係我嘅遺憾嚟喎！嗰個人支持咗我好耐，係我米飯班主喎！電視就話唔收錢啫！如果佢套套戲都買飛睇我，我老細嚟喎！老細叫你影張相，你唔去影，咁你都唔襟撈啫！係咪？老細嬲咗你，唔買飛睇你，你咪死得？喂！我食咩飯？我食電影飯嘛，老細叫我影相我一定影！佢哋唔止係買飛嘛，對你感覺好嗰陣，會同朋友講呢條友唔錯o架，呢樣已經唔係錢可以買到啦！好重要呀親和力。

Alfred ：點解你面對鏡頭可以咁自如，咁自然呢？

發哥 ：由今日開始，你當身邊嘅人，同你做嘢嘅人好似屋企人咁，出到出邊都係屋企人，香港有幾大啫！700萬人，你咪鍾意晒700萬人囉！你幾多親戚呀！有咁多人傍住你、撐你，點會要你衰呢？係咪！阿鏗哥！許廷鏗吓話，你啲歌好好聽！

茅塞頓開 學習顧及身邊人！

形象親切的巨星發哥親解如何增加親和力，令Alfred茅塞頓開，他說：「首先好多謝發哥回應小弟嘅提問，獲益良多之餘，亦好開心發哥有聽小弟嘅歌！去到發哥咁樣嘅地位都仍然咁諗身邊人感受，係好值得我學習！我都希望對廣大市民好啲，目的唔係令佢哋點樣鍾意我，反而希望好似發哥所講，係好似親戚關係咁！」