前HotCha成員張惠雅前日乘搭的士返工期間發生車禍，導致鼻骨爆裂險破相！心繫工作的她事發後不理傷勢繼續開工，直至後來覺得頭暈兼全身麻痹才往求醫，她猶有餘悸說：「學識以後搭車要萬事小心！」　　

Regen發生車禍後未有為意傷勢繼續開工，認真大頭蝦！

Regen展示鼻子的傷勢，明顯撞歪。

Regen後來察覺身體不適才前往醫院檢查。（獨家圖片）

組合HotCha去年拆夥，三位成員各有發展，其中張惠雅（Regen）除了唱歌外，亦主力拍劇。近日忙於拍攝新劇《末代御醫》的她突然飛來橫禍！事緣前日清晨五時許，Regen獨自乘搭的士回將軍澳電視城拍攝《末》劇，當的士駛經環保大道時，懷疑司機打瞌睡，加上天雨路滑令車輛撞向石壆，車頭嚴重損毀，坐後座的Regen亦不幸受傷，鼻骨爆裂！

全身麻痹睇急症

記者昨日就此事致電Regen，她猶有餘悸表示今次是她首次撞車：「好恐怖！撞嗰下好暈，我仲要望住佢撞落去石壆，撞落去嗰下仲要聽到司機講『死啦死啦』，嗰陣司機都醒番，跟住我就攤咗喺的士度休息。」心繫工作的她由於趕返工，不知司機有否報警，只聽到司機Call拖車，而她則步行返公司。行了大約五分鐘，她見到同劇演員林秀怡坐的士，故坐其順風車。她又指撞車後雖自知撞到鼻子，但最初不覺有任何不適，亦沒有表面傷痕，故繼續開工。直至早上十時許遇上黑雨，原本拍外景的她停工，此時傷勢才「嚟料」！Regen表示收工後開始不舒服，不但頭暈，更全身麻痹，其後她匿在一角休息，劇組人員見狀亦十分擔心她，同劇演員蔚雨芯更逼她到將軍澳醫院睇急症。照X光後，Regen才知道鼻骨爆裂，而醫院即轉介她看耳鼻喉專科，故她昨日到佐敦私家醫院看專科醫生：「醫生叫我要休息幾日，等鼻嘅傷勢消腫，之後再等多一個星期覆診，睇吓情況有冇改善，再決定使唔使做麻醉手術加鼻箍落去。（點解撞咗車仲去開工？）因為拍劇係成Team人，同埋嗰陣唔覺得唔舒服，係收咗工先感覺到頭暈同麻痹，之後先開始識驚。（會唔會追究個司機？）覺得司機好慘，成架車爛晒，所以唔追究，自己都有買保險。」

父親囑小心嗌邪

她又指已報警，但又氣憤地表示原本打算可以早到公司，豈料撞車令她遲了十五分鐘，更表示平時開工爸爸不會理她：「但事發當日佢竟然問我係咪搭的士，仲叫我要小心啲，所以諗番都覺得好邪！不過自此學識以後搭車要萬事小心！」問到可擔心毀容？她搞笑地說：「好唔開心，本身都唔係靚，依家仲要整歪個鼻，啲同事仲要激我，話我有藉口去整容！」