昨日在《東網巨星》播出的第八集《我愛發哥》，輪到女星鄧麗欣（Stephy）向男神周潤發舉手發問，期間發哥語出驚人，竟笑指Stephy男友方力申珠圓玉潤，相反Stephy則奀挑鬼命冇啖好食，勸她要搞好「婆媳」關係！

發哥建議Stephy搞好「婆媳」關係。

Stephy希望有機會野生捕獲發哥。

Stephy：我愛發哥因為佢好專一，咁多年都冇咩緋聞，對老婆非常專一！所以我好愛佢。另一樣係佢好有毅力，而且佢好鍾意運動，又鍾意行山，呢份毅力好值得後輩學習。

發哥　：你好大投資吖，成隊嘢咁出嚟，仲做埋領隊同教練，你真係勞心勞力！冇得頂！我覺得小方同你一齊係佢嘅福氣。（Stephy：我都覺呀！）你睇吓佢珠圓玉潤。（Stephy：發哥都話你肥呀小方！）你照顧佢都辛苦，你瘦咗咁多，佢就愈來愈肥仔，你叫佢做多啲運動減吓肥，Paco見到我，我都話小方好有眼光，不過我上次見到佢同阿媽兩個陰啲陰啲慶祝伯母生日，佢哋好恩愛，你小心啲，行多啲外母（奶奶）政策，我見你咁奀挑鬼命，佢兩個匿埋自己食唔畀你食，餓到你咁瘦！

Stephy：你多數會喺邊一個街市出現多？我都好鍾意行街市，如果喺街市見到發哥就好喇！

發哥　：嗱！香港街市有好多，但我唔去香港嗰邊，多數喺九龍，北河街、桂林街、鴨寮街多嘢睇，順便去掃街，桂林街街尾有間東星曬相，我一落深水埗就會去掃街，然後九龍塘行去九龍城又好近啦！喺我地頭，有時行開旺角街市，又會上去市政大樓吔粥，個豉油王炒麵都唔錯，但入面有空調我又唔鍾意，我鍾意街邊檔，多啲空間！最有特色係廣東道，我細個喺砵蘭街住成日同外婆去買餸，有好多回憶，廣東道街市好長，朗豪坊一路行到去上水……上海街，去埋官涌街市，又好多嘢賣，去街市係好開心，想食咩買咩都有！廣東道嘅街市係我至愛呀！