徐濠縈（阿徐）前晚出席活動，提起老公陳奕迅（Eason）早前被拍得與一班老友做運動至滿頭大汗，問到Eason是否減肥，她說：「係就好喇！佢話佢唔會戒煙、唔會跑步，愈叫佢就愈唔會做，佢性格係咁。（覺得佢急切要減？）都急！佢唔減我唔生！其實Wyman（黃偉文）有教過我話叫佢戒煙我先生，依家就要佢戒煙同減肥我先生！」並指女兒亦經常叫老公戒煙：「個女仲喺學校拎咗戒煙熱線畀佢。」她又笑言要Eason減肥需要搵間公司：「其實係想佢健康好，唔想佢第時老有咩病，佢依家有輕微問題！（咩問題？）我唔講得，要保留佢私隱。輕微問題！同飲食有關，呢排要煲好多畀佢，佢睇中醫，畀佢食啲藥材粥去吓啲血脂。」談到Eason是否想生B，她說：「我要挾佢，佢梗係想啦！男人又唔使佢佗，我佗要犧牲好多。」

徐濠縈要陳奕迅的起心肝減肥及戒煙才肯生B。