黃日華女兒黃芷晴在內地劇中有多條感情線，當中跟男演員陳堃的一段情遭前中國小姐曹靖恩介入，兩人更在水中偷情激咀，看在眼裏的芷晴嬲爆踢沙，損腳收場。

黃芷晴抱着出軌男友陳堃，表情傷心交足戲！

陳堃與曹靖恩在水中激咀看似浪漫，其實有苦自己知。

黃芷晴目睹男友偷食嬲到踢沙，結果損腳收場。

黃芷晴（前左）與陳堃、曹靖恩劇中發展三角戀，但現實中已結為好友。

黃芷晴最近忙於拍攝內地劇《只有情永在》，飾演大學生的她因樣子甜美及性格開朗，獲安排四條感情線！芷晴笑言因跳拍關係，經常搞亂情緒，因此要仔細分析：「我分別同老闆、同事、律師同偵探有感情戲，對住唔同人有唔同態度，有時拍攝上重疊咗，又未必有對白交代，所以要搞清楚嗰場戲心情係點。」

其中芷晴與陳堃的感情戲遭男方舊愛曹靖恩（前名：曹越）介入，陳堃及靖恩情不自禁在沙灘偷情，並在水中忘形激咀，嬲得芷晴踢沙洩憤，她說：「我要踢水，但因為有好多細沙石，踢到對腳損晒，不過都唔夠佢哋要捱凍落水咁慘。另一場戲我對住陳堃有大段感動對白，講講吓有真喊，諗番以前一啲唔開心嘅嘢。」

曹靖恩硬飲髒水

至於曹靖恩及陳堃鏡頭前纏綿，其實有苦自己知，要捱凍及硬飲污水！靖恩說：「啲水好凍，又有好多石頭鎅腳，仲遇正潮漲，好多垃圾湧過嚟！而且水幾深，腳掂唔到水底，我妝都溶晒喇！難為陳堃仲要錫我，鏡頭前營造浪漫感覺，都幾難忘！」曾參選中國小姐的她很高興可參與這次演出，更與芷晴及陳堃成為好友，早前她綵排舞台劇，兩人亦有探班。