林芊妤（Coffee）、王宗堯、張建聲及徐錦江等昨日到旺角宣傳新片《壹獄壹世界》，大會招募數十市民進行「鬥踎」比賽，Coffee用撩撩棒撩男參賽者，有男參賽者興奮大嗌，令Coffee面露尷尬。提到戲中情慾戲，她說：「我幾乎場場都係同王宗堯嘅情慾戲，意識大膽，自己睇都要遮面，爹哋之前問拍乜戲，我都唔識答。以前男友就問我做乜拍三級戲？我冇理佢，關佢咩事？（個男仔係ifc殘廁嗰個？）唔係，係再之前嘅男友。」

王宗堯（前右一）用撩撩棒撩Coffee，令她笑不攏嘴。

Coffee用撩撩棒撩男參賽者。

徐錦江、馬嘉韻與市民「鬥踎」。

王宗堯對於累Coffee收投訴，他說：「邊個投訴？ifc嗰個？點解投訴？係疼錫人就咪飛人，好好哋一個女仔，本來可以疊埋心水嫁人，未必要做演員，依家Coffee自食其力，一個女仔支撐成家人，聽講話買樓添，佢條路行得幾好，我祝福佢！」張建聲則透露有脂肪瘤：「我阿爸患過癌症，我有啲擔心，過幾日拍廣告要Show肌，怕粒瘤被誤會係腹肌，考慮做手術整走佢。」

久未在港露面的徐錦江與太太到場，他說：「近年多數拍內地製作，但我鍾意拍香港嘢。（搵人民幣豬籠入水？）唔知我收幾多錢，入行到依家都係冇錢嘅！」