影帝任達華昨日出席攝影展時表示，近日有重投電視劇的念頭，有感現在是合適的時候，最想與謝安琪合作，因覺得對方非常聰明及入屋。

任達華有重投電視劇的念頭，最想與謝安琪合作。

范敏嫦（左起）、黃志輝、楊受成、吳冠強、任達華及莫鳳蓮齊齊出席活動。

影帝任達華昨日出席《歐化「家」任達華．「相」遇40周年攝影展》，借出多達20幅珍貴攝影作品和品牌的意大利家具一同展出，而英皇集團主席楊受成除了親身捧場，更送上花牌，十分畀面！華哥表示並非首次在港舉辦展覽，但就首次公開作品，最喜愛的作品是攝於英國教堂：「平日周圍去會影咗啲相先，之後會將呢啲相重畫一次，變成油畫，諗住之後再做一個展覽。（畫咗未？）畫咗幾幅細細哋，我買咗個貨倉，諗住會整個畫同相嘅Studio，同囡囡分享。」

囡囡畫畫至叻

問到會否找太太琦琦及囡囡擔任模特兒？他說：「囡囡係，太太都肯畀我影，同畀我望住畫，喺忙嘅生活入面，做吓呢啲事會好開心。（囡囡好合作？）佢就係唔會坐定畀我影，但咁先好，咁先影到最真實嘅一面，同埋我依家搵緊老師學插畫，主要係畫我個女，我本身完全唔識插畫，希望透過呢樣嘢同佢有多啲互動。（囡囡畫畫叻？）佢好叻！（有幾多幅作品？）好多，花嘅都100張，計埋其他有幾百張。」

演時裝展活力

華哥又自爆早前欣賞顧嘉煇演唱會，萌生拍攝電視劇的念頭：「特別係見到阿姐（汪明荃）、黃杏秀、仙杜拉，我諗係合適嘅時間拍番套，之前舊劇重播，30年前拍過嘅劇集喺30年後可以睇番，係好好嘅回憶。（有時間？）等我諗吓，係時候抽時間。（想同邊個合作？）謝安琪，我覺得佢好聰明，除咗唱歌勁，同佢拍可以幫到入屋。（時裝定古裝？）時裝，因為我有現代嘅活力。」他坦言最想與無綫合作，最懷念《新紥師兄》的韓彬一角，但笑言不會找戚美珍再續前緣，反而希望與鍾楚紅合作。