第二集《我愛發哥》昨日播出，張敬軒與影帝周潤發隔空過招，發哥自爆被軒仔的血漿頭嚇窒！他又教軒仔保持樂觀心境，令五臟六腑騎騎笑！

發嫂準備了蛋糕為發哥賀壽，二人頭貼頭合照，Sweet到暈！

網友最愛的男歌手軒仔勁欣賞發哥的聰明才智。

軒仔：同好多影迷一樣，我鍾意發哥電影入面嘅瀟灑，生活中嘅親和力，私底下同發哥相處最鍾意佢嘅智慧，發哥係好Intelligent（聰穎）嘅男士，同埋佢博學，除咗識好多文學作品，睇好多書之外，佢都幾八卦，佢每日都會掃晒全部報紙嘅時事版、經濟版、港聞版、娛樂版，有好多我啲八卦娛樂新聞佢都知，每次喺髮型屋見到都會問我近期新聞。

發哥：講開又講，你嗰次做咩整到成頭都係血呢？嚇得我以為你畀人扑親個頭！我舊時喺TVB有一次都係成身血，點解我唔洗呢？因為我冇覺好瞓，返去搵張廁紙捲起就瞓覺，因為我跟住就要開早班，返到去都四點幾，瞌得個幾鐘！我就話啫！你唱歌嘅做咩都搞成咁呢？做咩唔搵嘢止血呢？仲要包晒頭，現場又冇人叫999，原來佢係去唱歌，嚇得我吖！

軒仔：搵食艱難呀發哥！

軒仔：點解可以成日都Keep到咁開心？我每次喺髮型屋見到你都係笑騎騎，點解呢？

發哥：我喺後面放毒蛇你唔知啫！做人開心，你畀緊正能量人哋嘅，就算人哋唔開心，見到佢個樣都開心，感染力好緊要o架！開心係令身體好啲，每一個五臟六腑都會騎騎騎咁笑，都唔會有咁多病毒o架！你有咩咁愁啫！你有車有樓又靚仔，又有靚髮型師。

軒仔追問：男人食咩補身好?

得到發哥嘅神級回覆，軒仔當堂醒神晒，驅使好奇心發作，向發哥連環發問！軒仔說：「多謝發哥教路！小弟呢，化個妝就係諗住搞搞新意思o架啫！你睇發哥塊面，嘩！青靚白淨，仲係花一樣！我又有一個問題喇！我見你保養得咁好呢，男人食咩補身好呀？我阿媽成日煲啲海馬啲古靈精怪嘢畀我，我想問發嫂煲咩畀你，食得你咁青靚白淨o架呢？」