梁漢文（Edmond）昨日為個唱舉行記者會，眾好友拍片支持，其中張衞健「重口味」想看他掉轉着T-back，嚇到Edmond抹汗又大叫：「唔好搞到冇人嚟睇！」

阿徐幫梁漢文度下圍，梁漢文即整古做怪。

蘇永康（左）與張衞健拍片賀老友，不過啲建議認真重口味！

歌手梁漢文昨日以型格西裝褸造型，在銀樂隊伴奏下現身其《紅館中場表演2015》個唱記者會，會上播出多位好友的祝賀片段，包括歌神張學友、陳奕迅、蘇永康、張衞健（Dicky）、劉浩龍（師兄）及林敏驄等，他們更分享想Edmond於個唱上做甚麼，當中以Dicky最重口味：「我想睇佢着閃石T-back彈琴，不過係掉轉嚟着，條線喺前面！」Edmond即嚇到要抹汗補妝！

前前後後一齊露晒

至於徐濠縈以「徐醫師」身份神秘登場，即場幫Edmond量度出三圍數字36、29、36，嫌Edmond太瘦的阿徐送上巨型菠蘿包和大杯牛奶幫他練大隻，更笑說：「食呢啲唔怕肥，演唱會要好大體力，睇我屋企嗰個（指老公陳奕迅）就知！」

問到會否聽從Dicky的建議？Edmond笑說：「佢覺得嗰條嘢可以遮到我？定覺得唔需要遮？嗰條界嚟，咁點遮到呢？」又稱會考慮朋友意見，但接受與否是另一回事。至於極限是甚麼？他說：「倒轉T-back嚟着仲唔夠極限？咁真係吊吊揈喇喎！」眾多建議中他會再考慮師兄的意見：「着絲襪叉晒啲腳毛出嚟唱《衣櫃裏的男人》，不過好似愈講愈核突，唔好搞到冇人嚟睇！」

七位數製激光效果

Edmond表示將花費七位數字製作特別的激光效果，讓觀眾隨着效果跟他到其不同年代的歌曲，又預告個唱會騷肌：「指定動作，唔騷唔得啦！（好似上次咁露股？）前前後後一齊露晒！（老婆肯？）佢有份搞衫，上次露半股都係佢諗。」此外，他透露會有神秘女嘉賓為他的個唱演出一個重要的表演，更指該表演是對方從未做過，定會帶來驚喜。