首集《我愛發哥》昨日啟播成為城中熱話，女神謝安琪（Kay）與男神周潤發擦出火花！發哥笑指Kay唱完《囍帖街》後整條街消失，再封她是鍾楚紅，Kay聲稱要一世袋穩這句說話！

香港人心目中嘅男神發哥口才了得，大讚女神Kay似鍾楚紅，哄得Kay心花怒放！

Kay

話明有問必答，發哥滔滔不絕地回答Kay的提問。

鍾楚紅

Kay：我鍾意發哥，因為佢好靚仔，又好好笑，佢個樣、眼、嘴，成個面相都好笑，成日有一種笑臉，令人好開心啦！仲有鍾意佢嘅演技，咁靚仔嘅人，做咩角色都好，搞笑又得，惡又得，沉重又得，深情又得，喺我心中好完美！我好鍾意佢嗰套《秋天的童話》，影響我一生！嗰種浪漫呢，一個麻甩佬都可以同紅姑（鍾楚紅）咁嘅靚女發生感情，為我嘅戀愛觀帶嚟新視野。

發哥：你個張繼聰呢個麻甩佬，咪船頭尺囉！你咪鍾楚紅囉！你都好浪漫呀！多謝你呀！唱隻《囍帖街》，你唱完之後條街冇咗喇！好彩你有唱咋，唔係真係死人喇！

Kay：我知發哥游水好叻，我想問佢可以閉氣喺水入面最長時間係幾耐？

發哥：呢個舊時我後生嗰陣好犀利！25米由頭到尾都得，標準池就唔得，一定爆肺！短嘅就得，依家就唔知得唔得！有機會同你練一練！多謝你呀！

Kay：去到南丫島一定要食啲咩呢？

發哥：南丫島冇嘢食ｏ架，淨係得豆腐花，你唔使去都得喇！去就去索罟灣嗰邊，有海鮮，如果榕樹灣落船就要成九個字先過到去！一係你去食海鮮嗰度落船，然後行返去榕樹灣，食番碗豆腐花！下次南丫島見！

Catch Up 男神重點

得到發哥嘅神級回覆，Kay當然心花怒放，她興奮地說：「哈哈哈！好開心呀！發哥同我講咗好多嘢呀！尤其係我聽到嗰一句重點！一句重點！嗰一句重點好重要！就係佢話，你咪就係鍾楚紅囉！呢一句重點，我會好好袋住佢！OK？」