黃翠如與阮兆祥拖手仔穿梭鬧市喪跑拍劇，翠如即使手拖他人仍心繫愛郎蕭正楠，剛拍拖滿一周年的二人雖然因工作太忙而未有慶祝，但翠如左腳卻驚現「愛的紋身」！

黃翠如笑言左腳的紋身只係劇情需要，皆因男友唔鍾意紋身，故只能過吓戲癮，果然係聽話女友！

蕭正楠

阮兆祥拖住黃翠如係咁跑，吸引不少途人圍觀。

黃翠如與阮兆祥跑到身水身汗，要不停用紙巾抹汗及補妝。

黃翠如左腳的紋身

黃翠如為拍攝無綫新劇《為食神探》，剛與愛郎蕭正楠拍拖一周年的她，昨日毫不避忌地與阮兆祥（祥仔）在上環鬧市拖手喪跑，香汗淋漓的她即使拿出紙巾抹汗，依然如沐春風！雖然她與男友未有為一周年大事慶祝，但聽到祥仔向她道賀時，她即露出甜蜜笑容，其後祥仔更化身記者要求她用一句說話總結過去的一年，翠如笑說：「Running Man囉！好似我哋咁不斷跑。」祥仔聞言即打趣說：「即係一個愛情長跑，馬拉松嚟嘅！」弄得翠如哭笑不得。

未有準備周年禮物

問到翠如可有與愛郎互送禮物作為紀念？工作繁忙的翠如暫未有準備，她笑言忙到連補祝都沒有時間，惟見她左邊小腿外側驚現「愛的紋身」，問到是否紋身刻愛？她解釋這只是角色的造型：「佢（蕭正楠）好唔鍾意人有紋身，但其實我以前都有諗過紋，有一年去復活島，因為嗰度有個好出名嘅紋身師傅，可惜當時佢太太咁啱要生B而冇紋到，緣分嚟嘅！」

提到祥仔的生日將至，翠如大爆祥仔早已買過一個「全港最貴」的蛋糕叫劇組人員為他慶生，更笑稱祥仔經常買食物開工，祥仔笑說：「《為食神探》吖嘛！因為我覺得有一個有嘢食同埋開心嘅環境拍劇會事半功倍，尤其係我哋拍緊喜劇！」雖然他透露今年會將生日奉獻給工作，但翠如卻揚言會在生日當天叫齊劇組人員為他慶生補數！

撐女友夠瘦唔掗碇

另外，提到被指與正楠同居婚前試愛，翠如與昨日到將軍澳電視城拍攝無綫新劇《公公出宮》的正楠口徑一致，當日只是雙方有時間見面，二人均會以工作為先，談婚論嫁則稍後再談。提到翠如早前嫌正楠的家「唔夠大」？正楠笑說：「佢咁瘦，唔會好『掗碇』啫！」