糖妹（黃山怡）前晚與蔣志光於九龍灣出席活動，糖妹在台上唱歌及玩遊戲之餘，亦為假BB沖涼，她自爆小時候曾為細佬沖涼：「細佬細我11年，所以細個有幫佢沖涼，不過試過搞到佢甩臼，佢大咗之後有陰影，唔係好畀我掂！」糖妹雖未與阿蔣合唱，但其老師正是韋綺姍，她笑言若將來有演出韋綺姍沒空檔，可由她頂上與阿蔣合唱《相逢何必曾相識》。講到母親節，糖妹大呻媽咪拒絕與她慶祝：「尋晚同阿媽講話食飯，佢話冇煮我飯，咁同佢講聽晚食，佢話要去游水，咁依家惟有下星期先慶祝！」

韋綺姍徒弟糖妹自薦與蔣志光合唱《相逢何必曾相識》。

對於糖妹自薦合唱，蔣志光說：「係咩？我唔知吖！如果佢老師唔嬲嘅可以一齊唱，有另一番趣味嘅！」至於會否考慮再次於劇集獻聲？他說：「唔知！唔敢講！（星夢簽你做歌手會否考慮？）好似老咗啲喎！簽都簽啲後生o架啦！」他坦言不少人找他開騷，但未準備好，自認慢熱的他表示經常把握不住機會。