2007年港姐冠軍張嘉兒終於嫁人喇，恭喜晒！現年31歲的嘉兒昨日宣布9月下嫁34歲金融才俊Nate，圈中人紛紛送上恭喜，準新娘昨晚提及Nate的求婚過程時一臉甜絲絲，幸福滿瀉！

神采飛揚的張嘉兒風騷晒閃爆求婚戒。

披上幸福嫁衣的張嘉兒，早前於香港取景拍攝婚照。

Nate（左）、 張嘉兒 （右）

本報昨午致電張嘉兒送上祝福，她說：「多謝晒！其實Nate係兩年前求婚，但上次我哋返溫哥華，佢同我爹哋、媽咪提親，令我覺得好Sweet！」

愛的表白冧爆

嘉兒與Nate早前已於香港拍攝婚照，身穿單邊膊拖尾婚紗的她與老公到海邊及石灘影相，靚人靚景，不少人看過都畀Like！嘉兒昨晚出席慧妍雅集慈善晚宴時難掩興奮心情：「好開心呀，我終於結婚啦！上年家姐結，今年到我！因為家人都喺溫哥華，所以9月我哋會喺嗰邊註冊同行禮，再返香港補擺酒。（Nate點求婚？）佢喺郵輪上邊睇電話邊讀愛的宣言，搞到我邊聽邊喊。（求婚戒指幾多卡？）唔係好清楚，但幾多卡都會Say Yes！（婚後做少奶奶？）都想做嘢，要有生產力。（幾時生B？）二人世界先，父母都冇催，但姨丈想我雙喜臨門喎！」

微博宣布婚訊

嘉兒昨晨已在微博宣布婚訊，即獲陳法蓉及岑杏賢等送上祝福，嘉兒寫道：「原來茜伊（嘉兒在劇集《愛．回家》中的角色）沒有騙人，真係有命中注定！嘉兒找到『The One』啦！Yes，I Am Getting Married！I Am So Blessed To Have Found You In My Life，Thank You For Choosing Me Nate！（是的，我要結婚了！我很幸運地在我的生命找到你，感謝Nate你選擇我！）」

事實上，嘉兒與Nate早於2007年在溫哥華認識，後來嘉兒奪港姐冠軍留港發展，Nate堅持每年來港三次見嘉兒，惜聚少離多分手。後來嘉兒返溫哥華探親發現彼此變得成熟，舊情復熾，Nate更為嘉兒將工作基地搬到香港，冧得嘉兒相信Nate能給予她幸福，並認定非君不嫁。