明天是母親節，圈中藝人齊在《東網巨星》的「巨星最愛－母親節篇」為媽咪送上最真誠的心聲！已為人母的羅霖坦言母親至今仍獻出200%照顧；名模陳嘉容則指媽咪為幾兄弟姊妹含辛茹苦！

陳嘉容

吳業坤

張惠雅（Regen）

羅霖

名模陳嘉容

我心目中嘅最愛就係媽媽，我要多謝佢由細到大嘅照顧，喺我小時候媽媽去做工人，好辛苦咁獨自養大我哋幾兄弟姊妹，人生經歷咗好多事情，所以我一生之中最愛同敬佩一定係我媽咪！

吳業坤

我最多謝嘅一個人就係媽咪啦！因為佢對我嘅照顧係無微不至，佢係我屋企裏面嘅私人助理，好似如果我聽日要做嘢，我要呢套衫、嗰套衫，媽咪就會為我準備好晒！好似副眼鏡唔知放咗邊度，乜都可以幫我搵到。同埋每晚返到屋企，媽咪都會為我準備咗湯水，就算幾咁夜都要我飲埋先瞓覺，好錫我o架。

張惠雅（Regen）

我嘅最愛係媽咪，佢非常之犀利，成日Check住我喺網絡上嘅留言同行蹤，只要我話有少少不適，過一晚就會煲湯水我飲，呢一樣嘢比起隨叫隨到更誇張！自己都差唔多三十歲，希望可以報答媽咪，好想努力工作賺錢照顧佢。

「美魔女」羅霖

我心目中嘅最愛係我媽媽，因為佢由以前到依家都好辛苦咁照顧緊我，無論係我以前有哮喘定生咗3個小朋友都好，佢都係200%嘅照顧！冇佢嘅話，我人生就冇咁順利！另外，喺工作上佢都畀咗好多意見我，好似我選亞姐嗰陣，我唔想喺公園着泳衣，係佢同我講要做就做到最好，不斷支持我。好多謝佢令我學到好多嘢，不過我最學唔到佢嘅嘢，就係煮得一枱好餸。