陳嘉桓周嘉莉品味A5和牛

藝人陳嘉桓與師妹周嘉莉，經常四出搜羅香港著名日式料理食府歎名菜，她們相約到銅鑼灣區新開業、極具氣派的霜月Shimo日本料理餐廳試菜。兩位無牛不歡的「牛魔王」，面對頂級菜式「日本A5鹿兒島和牛Sukiyaki 」、極品「和牛Sukiyaki壽司」和王牌「鱈場蟹Shabu Shabu」垂涎三尺，全面失控食個不停。

陳嘉桓（左）約定師妹周嘉莉到霜月Shimo日本料理餐廳大歎高級菜式。

陳嘉桓大讚王牌「鱈場蟹Shabu Shabu」味道鮮甜，一試傾心。

周嘉莉細心品嘗爽口的日本岩蠔，配以醬汁透出淡淡柚子香。

日本A5鹿兒島和牛Sukiyaki $870
壽喜燒的醬汁會加入和牛的油脂、牛筋和牛肉，連同豉油熬足3至4小時至入味，將一片油花均勻的A5和牛肉眼片輕輕一灼，再蘸蛋汁吃，滿口油香。

月見碎吞拿魚腩丼 $250
米飯選用日本米及新鮮拖羅免治魚肉，加上日本山口縣長州雞蛋、芝麻、葱及紫菜，啖啖魚鮮味。

法國Fleur des Eaux生蠔 $80
日本岩蠔 $80
前者中文名水中花，來自法國Brittany的海域，先吃到海水鹹鮮再滲出甜味，Aftertaste強烈。後者來自日本兵庫縣，肉質爽口。

角切魚生丼 $170
每次會選用4至5款當造白身魚作配料，今次就有吞拿魚及三文魚等，再加上紅酒蕎頭、淮山、牛油果、三文魚子及蟹籽，層次相當豐富。

北海道丼 $250
由山形縣白米所煮成的香飯，面層鋪滿來自北海道的馬糞海膽、帶子及三文魚子，佐以由木魚及昆布浸煮醃的豉油來吃，令海鮮味道更濃。

和牛Sukiyaki壽司 $100
手板大的鹿兒島A5和牛片，先利用火槍略燒已輕易帶出香味，再掃上壽喜燒醬汁，混合葱花一同進食，入口即溶。

辣吞拿魚壽司卷 $200
以吞拿魚、青瓜、蟹籽和自家秘製辣醬作餡料，捲好後再灑上同款辣醬、芝麻、葱絲和七味粉，辣中帶香。

鱈場蟹 Shabu Shabu $880
將鱈場蟹放於木魚昆布清湯內簡單烚煮約3至4分鐘，蘸用鮮柚子汁和檸檬汁等調配的酸汁，微酸加強蟹肉的鮮甜味。最後加入日本蔬菜來吃，將湯中的鮮味精華索個一滴不漏。

超高樓底伴着半圓拱瀑布形的牆身配以巨型壽司吧枱，舒適幽雅。

特設兩個榻榻米包廂，大的可坐8至10人，最低消費$8,000；小的可坐4至6人，最低消費$6,000，私隱度高又舒適，最啱同朋友包場開Party。全落地玻璃窗設計，居高臨下飽覽銅鑼灣及跑馬地的景色，景觀開揚。

（左起）李師傅、輝師傅、陳師傅

對飲食極之講究、熱愛日本文化的陳嘉桓（Rose）和周嘉莉（Rachel）甫踏入霜月Shimo，即被華麗頂級的裝潢吸引，Rose說：「大部分日本餐廳都選用黑色為主色設計，但霜月Shimo與別不同選用柔和燈光，配合窗外投射的天然光，有一種好溫暖同舒服嘅感覺，加上VIP獨立房設計得甚有日本氣息，極具氣派！而最大賣點係可以望到馬場景，一覽無遺。」Rachel亦給予很高的評價：「一入餐廳就覺得好開揚，座位位置有滑動趟門式屏風相隔，感到私隱度好高，食得舒適。」

陳：陳嘉桓　周：周嘉莉

陳：Rachel，知你同我一樣鍾意食日本料理，今次帶你嚟新開張華麗高級食府霜月Shimo，梗係有好嘢介紹畀你啦！呢度午巿和晚巿都有唔同嘅高級菜式供應，一定滿足到你同我啦！

周：師姐，唔好講咁多，快啲介紹主打王牌菜式畀我試啦！我見到個餐牌啲食品咁美觀咁吸引，已經流晒口水啦！

薄切和牛醬汁講究

陳：我知你同我一樣，都係無牛不歡嘅「牛魔王」。呢度馳名頂級「日本A5鹿兒島和牛Sukiyaki 」，Sukiyaki即係壽喜燒，淨係個醬汁都相當講究，係嚴選A5和牛嘅油脂、牛筋同牛肉加埋豉油，熬三到四個鐘而成。你睇吓份和牛，刨得幾薄，真係冇得彈！

周：嘩，個醬汁甜得嚟好足料呀！一入口感覺到好濃郁嘅和牛肉味同油香，完全冇油膩嘅感覺，好好味呀。Rose你都試一件吖！

陳：梗係要試！我仲要留肚食呢個極品「和牛Sukiyaki壽司」呀！你睇呢件鹿兒島A5和牛片，同我隻手差唔多咁大，就知唔係浪得虛名啦。首先用支火槍燒一燒帶出香味，然後掃上壽喜燒醬汁，再放上葱絲同壽司飯一齊食，啖啖都係牛嘅精華，食一件點夠呀，使唔使留一件畀你呀？

湯底足料啖啖精華

周：梗係要啦師姐！但可唔可以試埋另一款王牌「鱈場蟹Shabu Shabu」呀？

陳：師妹果然識食。「北海道鱈場蟹」每日新鮮運到，名副其實夠晒新鮮。只要將蟹放落去由木魚、昆布煮成嘅清湯底入面灼一灼，再蘸啲用鮮柚子汁同檸檬汁調校而成嘅酸汁，完全係絕配呀。

周：食完啲蟹我要將來自日本嘅野菜放落個湯底度，等佢吸晒啲精華，甜上加甜，我食到停唔到口啦！

頂級A5 品質保證

周嘉莉除了肚子大滿足外，更獲年輕帥哥輝師傅教路，區分和牛的級別，此行真係「收穫豐富」，她說：「原來鹿兒島係正宗和牛原產地之一，出產嘅和牛擁有完美肉質油脂分布比例，肉質鮮紅幼嫩，肉味濃，由於雪白嘅油花熔點低，約25℃就會溶化，所以只需稍為灼一灼就食得。而霜月嘅A5和牛，就係和牛之中最高等級，油脂最為豐富，口感入口即溶，牛肉油花分布平均、細緻，肉質比較嫩同多汁，今次真係學到好多嘢！」陳嘉桓對霜月Shimo給予滿分，更大讚選址就腳，位於銅鑼灣區旺點交通極之方便，相約三五知己聚會就最好不過！

主打推介：Shabu Shabu Sukiyaki

霜月Shimo日本料理餐廳以Shabu Shabu和Sukiyaki作為賣點，當然是必試之選！愛食牛肉的話，可揀選即點即刨至3mm薄的鹿兒島A5和牛，或者牛味濃郁的美國Prime Grade作Sukiyaki，肉味香濃，入口即溶。想為味蕾帶來一絲清新，可揀選鱈場蟹Shabu Shabu，鱈場蟹肉放於以木魚和昆布的清湯底內，輕灼3至4分鐘，配以檸檬汁和柚子汁等混合而成的配汁進食，瞬間提升蟹肉的鮮味。

另外，餐廳亦提供生蠔、天婦羅、燒物和壽司等傳統菜式，食材全部經過嚴格挑選，既有富彈性而黏糯的山形縣白米所做成的傳統丼飯及壽司，還有來自日本岩手縣的白金豬、山口縣長州的雞蛋及福岡大分縣的深海池魚等優質靚料。

瀛格木不暇給

以日文「下霜的季節」命名的霜月Shimo日本料理餐廳，充滿詩情畫意，餐廳設計以簡約為主。佔地約2,000平方呎的霜月請來日本設計師設計室內裝潢，以傳統木材作主材料，主用餐區的木桌子和同色系的繡花梳化椅，加上格仔木屏風襯托，帶出和諧簡約的和風。巨型的壽司枱是師傅展現刀功和手勢的舞台，其高樓底天花以砌成弧形的木板伸延至牆身，在燈光的映襯下，恍如小瀑布徐徐流動，線條柔美。想更確切感受和室風味，可移玉步至榻榻米廂房，兩個榻榻米包廂，大的可坐8至10人，小的可坐4至6人，包廂配以落地玻璃窗，遠眺跑馬地一帶景色，邊呷清酒邊欣賞，分外迷人。

主廚高手雲集

店內的3位師傅經驗十足，李師傅約有10多年經驗，曾任職港島香格里拉大酒店，主理廚房如Shabu Shabu和Sukiyaki等鍋物製作。年輕的壽司部主廚輝師傅有10多年經驗，曾於本地千登世及新加坡Fat Cow等著名食肆任職，擅長壽司及刺身。而陳師傅則有15年經驗，曾於悅來酒店工作，負責海鮮如鱈場蟹、生蠔等料理。