資深「殭屍」錢小豪憑《殭屍》一片再度爆紅，坦言是一個「宿命論」！闊別香港觀眾已久的他，一別就是十八年，今次有機會回無綫拍劇，令他期待！

錢小豪

高高低低的動作猶如人生，錢小豪坦言已睇化。

錢小豪身手敏捷，踢腳打拳勁度十足！

錢小豪與香港觀眾闊別十八年，今次回歸香港參演無綫劇《潮拜武當》：「好多以前係少女依家變咗師奶嘅人都同我講：『好耐冇睇你拍劇喇！』」談到回港拍劇，他說：「都適應嘅，拍咗戲咁多年，過百部電影！今次時間掌握得好好！」

新劇「開正我嗰瓣」

小豪哥大讚今次接拍的無綫劇題材新鮮：「打戲唔多，動感元素就好多！有飛車場面，無綫幾揼本，出咗好多名貴跑車畀我揸，開正我嗰瓣！好多時大家聽到《潮拜武當》都以為係古裝，其實係時裝。當初接拍都因為我對個題材有興趣，佢用老子嘅道德理念同現代香港後生仔嘅辛苦Mix埋一齊，係好有意義嘅哲學劇。」

當年以電影《殭屍先生》爆紅，今次又憑《殭屍》翻身，小豪哥坦言曾自覺失敗：「呢個係宿命，哈哈！拍完《殭屍先生》之後有5、6年都拍類似題材，覺得自己冇用、好廢，除咗呢種題材，冇人搵你拍其他嘢，就心灰意冷過咗台灣，寧願演反派都唔想再拍殭屍戲，想畀人知我嘅演技！」

做唔到主角都係演員

一年前小豪哥決定回港，多得麥浚龍（Juno）：「Juno話對殭屍戲好有興趣，細細個好鍾意睇，想實現呢個夢想。我當時都唔知開心定無奈，心諗又拍？我覺得佢好有心，令我好感動！」入行三十多年，小豪哥坦言睇化高低起跌：「有啲人出道兩、三年唔見咗，我算好幸福啦！做唔到主角我仍然係一個演員！」