應屆港姐邵珮詩、王卓淇、何艷娟與師姐陳凱琳（Grace）、蔡思貝及劉佩玥昨日為新一屆港姐展開招募活動。不過現場所見，宣傳海報竟不是以應屆港姐作賣點，反而由前港姐陳凱琳、蔡思貝、劉佩玥、朱千雪及黃心穎五位師姐孭飛，大會統籌經理余詠珊說：「想搵啲一夜成名嘅人，前年港姐依家有一定知名度，希望港姐可以成為明日之星，希望畀個訊息選完美係會有機會，唔係選完就算。」提到應屆港姐邵珮詩等知名度低，余詠珊說：「有啲人比較慢熱，佢哋比較慢熱，但唔急得。」她又坦承去年秘密進行選美是失敗的，已吸取教訓。

新一屆港姐的招募活動由蔡思貝（左起）、陳凱琳及劉佩玥等擔大旗。

邵珮詩

赴日韓台特訓

新一屆港姐以「一夜成名 打造璀璨前程」為口號，希望發掘明日之星，問到今年會否秘密進行？余詠珊說：「唔會喇！怕咗，TVB需要靚女出嚟選，我哋想搵未來新明星，今屆港姐會去日本、韓國、台灣演藝訓練學校上堂，由當地勁人教佢哋跳舞。」她又透露賽制希望由全民投票選出：「希望全部全民投票，由觀眾選擇，因為觀眾選擇最可靠，今年希望試，唔得下年都會做。」

提到宣傳海報冇份，邵珮詩說：「公司叫我哋可以自己拍宣傳片放上網，可能遲啲會再安排。（知名度唔及陳凱琳等人？）佢哋訓練得耐啲，Noise會多啲，我哋只係得個半月，好多嘢靠自己把握。」而孭飛宣傳的陳凱琳被問到可覺得應屆港姐沒人認識？她說：「唔會，可能有一兩年經驗，分享經驗會好啲。」