朱千雪 臨場爆肚 考執生

入行短短三年，2012年香港小姐季軍朱千雪已挑戰五套不同種類的劇集，包括在《On Call 36小時II》飾演醫生及《再戰明天》扮演懲教人員等。於《以和為貴》初演喜劇的她，扮演有輕度自閉症的角色，監製看上她文靜及淡定的特質，認為千雪似足角色才落實選角。一試便愛上演喜劇的千雪自覺有喜劇細胞，更希望日後能挑戰浮誇角色：「我好慢熱，但熟落咗就好鍾意講笑，同埋自己都好鍾意笑！第一次拍喜劇已經好鍾意，拍咗五套劇最鍾意就係呢套！我自覺有喜劇細胞，希望可以拍多啲喜劇同浮誇角色，出嚟效果大家會鍾意。」

見招拆招

成功的喜劇往往要靠演員的臨場爆肚擦出火花，《以》劇演員每次開工亦會爆肚，問到千雪是否應付得來﹖她說：「初初都唔敢爆肚，但好彩角色有輕度自閉症，幫到我好多，會做出好多普通人唔敢做嘅嘢，只要加少少效果就會好出，都係靠臨場發揮執生！每日開工除咗記熟劇本，你都會知每個人都會爆肚，劇情、劇本都會有啲改動，所以每日都會有新嘗試、新挑戰。」

反應變快

千雪於《以》劇與馬德鐘及徐子珊兩位前輩最多對手戲，談到是否接得住對方爆肚﹖她說：「接到見招拆招，大家都要互相接招，最難應付係馬德鐘同徐子珊，估唔到佢哋咁有喜劇感，戲裏戲外都好搞笑。拍完自己嘅反應都快咗好多，因為唔快接唔到。」

喜劇演員最難的是令人爆笑同時忍笑，千雪說：「好彩角色有嘅特徵唔係點笑，但講啲嘢就令到大家發笑。自己都忍到笑，一埋位就唔笑，但一停機大家就笑到唔停。」

情同姊妹

繼《再戰明天》後，朱千雪與徐子珊再度合作並於《以》劇扮演相依為命的姊妹，令她們感情昇華：「我同子珊都好似，兩個都好慢熱好怕陌生，唔熟就唔會專登傾偈，經過《再》劇後今次再做姊妹，大家就真係熟落咗，戲裏戲外我都叫佢家姐，連啲同事有時都問你家姐呢？呢個家姐真係仲好照顧我，好似知道我之前拍《拆局專家》要打，都特登打畀我借啲保護墊畀我，好關心我！」

男人勿近

於劇中感情線欠奉的千雪是絕緣體，所有男士都不能接近，否則會出手傷人，她笑說：「劇裏面講我唔畀人掂，一掂到我就會郁手打人，大部分男演員包括馬德鐘都畀我用防狼三式插眼、打肚、踢上下五吋，我唔識打，靠班身手好嘅男仔就我。」

她更上網自學跳Gwiyomi舞步，面對四位猛男「威震江湖」賣萌，她更將原本十多秒的舞步Loop足四分鐘，跳到導演嗌Cut機才停步：「隻舞上網學淨係得我識，其實得幾個舞步全長十幾秒，拍嗰陣導演一直冇叫停，所以我就重複跳咗四分幾鐘，心諗導演仲未叫停嘅！原來佢一直以為我未跳完，畀我繼續跳。」

後記：自動「撻着」

朱千雪的確如她所講，遇上不稔熟的人會變得沉默，不少人最初擔心她難以適應娛樂圈，但人會隨着環境成長。由當初參選港姐，她受訪時對答精簡得一句起、兩句止，三年過後，她今次受訪不用熱身已經「撻着」滔滔不絕，可見成長不少。