余文樂（樂仔）出名顧家，錫妹妹余文琪錫到燶，昨日樂仔見證妹妹與有「三分球神射手」之稱的陳守健拉埋天窗，榮升大舅的他感動地說：「任務完成！」

樂仔與家人關係一向良好，對妹妹余文琪更是疼愛有加，不但早年辛苦賺錢供妹妹到外國留學，去年八月中，樂仔籃球隊友、有「三分球神射手」之稱的陳守健，在籃球場上向拍拖多年的余文琪求婚時，樂仔亦幫手大搞氣氛，更叮囑陳守健：「好好錫我個妹！」

粉絲：幾時到你？

昨日余文琪和陳守健正式拉埋天窗，向來低調處理家事的樂仔難掩嫁妹的興奮心情，罕有地全日在社交網站直擊妹妹出嫁過程，早上他先大晒與新郎哥及一眾兄弟團的自拍照，身穿禮服並戴上黑超的樂仔預備和新郎哥一齊接新娘，其後又上載陳守健跪於余文琪前的照片，並寫上：「以後乖喇！」一對新人亦跪在樂仔面前奉上大舅茶，接受樂仔的祝福。

傍晚，樂仔再大晒一對新人在婚禮上情深一吻的照片，樂仔滿心感動寫上：「我的任務終於完成了！我個寶貝以後就交畀你了！」雖然樂仔近年曾表示渴望成家立室，但至今仍未有着落，不少粉絲在樂仔社交網站留言恭賀余家喜事之餘，亦心急追問：「幾時到你？」

「我」就係厚禮

榮升大舅的樂仔興奮地向記者說：「好開心！好感動！終於可以將我嘅任務完成，希望佢哋幸福快樂！」問到送甚麼賀禮給一對新人？樂仔說：「我諗我就係佢哋最大嘅厚禮，因為以後我都會支持佢哋，疼錫佢哋！」