無綫今年台慶將製作真人騷節目《四個小生去旅行》，除《三個小生去旅行》的謝賢（四哥）、胡楓（修哥）與Joe Junior外，更加入新鮮出爐的金像獎最佳男配角曾江，經過四位小生商議後決定到俄羅斯拍攝。78歲的四哥表明今次要夠刺激，要求到太空中心接受離心訓練，一嘗做太空人滋味，無綫得悉後急急為他們加大保險。

四哥受訪時說：「好刺激咩，好小兒科啫，之前都喺沙漠玩過越野車。（霆鋒、婷婷會唔會唔畀玩？）梗係玩完先講啦！（出發前做檢查，睇吓心臟負唔負荷到？）我都冇心臟嘅！」他與曾江出名火氣十足，故無綫精挑細選多位靚女幕後同行，以緩和氣氛。

霆鋒一家溫馨合照

問到四哥可擔心與曾江擦出「火」花？他說：「以前粵語片年代合作過一兩次，佢躁唔躁底我就唔知，但相信佢今次一定好用功，因為佢啱啱攞完金像獎。我都好忍得嘅，係個刀槍不入嘅老人家，最多喺鏡頭後爆粗啫！」修哥則說：「我同老四講明，我唔受得太刺激，刺激嘢交晒畀佢，佢點止飛天，遁地都得。（做四哥同曾江和事老？）大家都咁多年朋友，冇事嘅。」

至於四哥兒子謝霆鋒與妹妹謝婷婷、與媽媽狄波拉關係密切，難得工作忙碌的霆鋒抽空與家人見面，前晚婷婷於網上大晒四人飯局時的合照，以及與霆鋒玩魚的照片。

另外，荷里活電影《狂野時速7》（Fast & Furious 7）票房大收，男主角雲狄素（Vin Diesel）亦暗示下集《狂野時速8》有機會來港取景，更有傳霆鋒有份加入劇組，本報記者向霆鋒經理人霍汶希（Mani）詢問，她表示暫時未有消息。

另外，曾江與胡楓昨晚出席活動，在神劇《大時代》飾演「龍成邦」的曾江直言未有收睇重播：「唔知咩係《大時代》，我有份演咩？我做完就唔記得，一啲印象都冇。」問到《大》有意開拍電影版，問到可會考慮參演？他說：「睇吓點，考慮先，唔會選擇角色，演員好被動，依家盡量做好，但我唔鍾意走回頭路。」