吳綺莉約卓林老師開會兩粒鐘

吳綺莉（Elaine）與女兒卓林近日因「飲酒及做功課問題」再生磨擦，卓林離家出走後二人「失聯」，Elaine昨日到女兒學校約社工及老師開會長達2小時。面青口唇白的Elaine在一名法律界女友人陪同下現身，約晚上7時，二人步出校門，女友人代Elaine開腔：「多謝大家關心，傾得好有成果，達成咗共識，總之互解互諒。（卓林幾時返屋企？）詳細情形遲啲先講，希望日後佢喺教育及身心發展方面都能夠健康地成長。」問到Elaine是否操勞病倒？她說：「個個阿媽都操勞啦！（依家飲酒唔揸車？）不嬲都係。（有人聞到你有酒味？）係我頂帽，可能係香水味啫！」而Elaine其後返回寓所附近醫肚。