林德信（Alex）與松岡李那的戀人關係，一直都相當低調，但前晚Alex竟破例大談女友，除承認「女友」已見晒家長外，還笑爆松岡李那很大食，嚇親細食的林子祥，十分搞笑！

林德信前晚笑爆女友松岡李那大食，嚇親細食的父親林子祥。

松岡

周柏豪（右起）、劉心悠和莊思敏等前晚出席新片煞科宴。

林子祥

林德信（Alex）、周柏豪與劉心悠主演的新片前晚舉行煞科宴，片中周柏豪與心悠經常吵架，談到嗌交，原來Alex才是「專家」，他笑言得爸爸林子祥（阿Lam）遺傳，即使嗌到朝早也不會累，幸開始練瑜伽後，所有壞習慣已改掉。

平時甚少談及日籍女模女友松岡李那（Linah）的他，還大爆不時跟女友嗌交，要經常給空間雙方冷靜，才能維持關係！戀情日漸浮面的Alex笑說：「我成日嗌交，咪睇我講嘢咁細聲、斯文，我都有脾氣。（對女仔都有脾氣？）對邊個都大脾氣。（女友頂唔順？）好多人都頂唔順，媽咪都頂唔順。（點箍煲？）畀啲時間囉，做自己嘢，搵朋友調節心情，有啲嘢畀啲時間、空間，冷靜吓就OK。」

生日飯局見家長

Alex又坦承曾帶Linah出席其生日飯局，更與母親吳正元及妹妹April見面，問到是否已見家長？他說：「可以咁講啦！嗰日所有家人、親戚都喺晒度。（當佢家人？）未係屋企人，冇乜點Label（標籤）。（媽咪有乜意見？）媽咪住美國，所以只係見過一、兩次。（葉蒨文呢？）冇見過，嗰晚冇嚟。」

對於阿Lam指Linah大食，Alex笑說：「爹哋平日食好少嘢，對佢嚟講見到會嚇親，加上依家啲女仔食好少嘢，難得有個女仔咁大食。（Linah坦率唔扮嘢？）都可以咁講。」

劉心悠罔顧形象

同場的劉心悠被讚拍嗌交戲七情上面，她稱無懼破壞形象，又笑言飾演的粗魯女與私下相似：「我喺屋企食嘢都會戙腳，同埋講嘢好粗魯。」

柏豪亦表示跟心悠同場時，總會在言語間不小心刺激到對方，引發心悠的陰暗面，由「女神」變成「超級撒亞人」，美女變霸王，才子周柏豪都形容得相當有趣！