以清純外貌俘虜一眾宅男的陳瀅和劉佩玥，情同姊妹的兩人昨日相約行街買戲飛，但陳瀅接二連三地挑戰大懵底線，猶如真人版「荒失失奇兵」，更激嬲劉佩玥搞到指手畫腳兼黑面，幾乎上演怒火街頭！

Jeannie（左）大頭蝦令Moon心情變差，兩人揀雪糕時無甚笑容。

行咗半個鐘冤枉路後，Moon（右）頂唔順同Jeannie理論，仲講到指手畫腳。

Jeannie搵極都搵唔到鎖匙，身旁的Moon即黑晒面。

Jeannie（左）和Moon見到記者即笑晒，力證冇嗌交。

最近因無綫劇集《四個女仔三個BAR》爆紅而榮升新一代宅男女神的陳瀅（Jeannie）及劉佩玥（Moon），昨日駕車現身九龍某商場，兩人還穿上熱褲大騷白滑長腿！

忟憎手指指

約下午三時，Moon和Jeannie相約行街Shopping，兩人先到戲院買戲飛，再去商場的客戶服務部辦理泊車優惠，不過向來大頭蝦的Jeannie辦理手續前，因找不到消費單據而不停摷袋，相當狼狽，最後連工作人員都睇唔過眼上前幫忙。

擾攘一番後，兩人終於前往停車場，期間經過超市，Jeannie被店內的雪糕吸引，即興奮地拉着Moon飛奔去揀雪糕，揀完一輪後便埋單走人。兩人發現記者時即笑笑口，問到是否看電影？她們說：「係呀！買定第二日睇。（睇咩戲？）《復仇者聯盟2》，我哋啱啱食完嘢，依家拎番架車走。」

惟到達停車場後，Jeannie又大頭蝦上身，竟然忘記了泊車位置，兩人在停車場兜了近半小時。起初仍有講有笑，Moon還笑Jeannie大頭蝦，但半小時後仍找不到正確位置，愈搵愈忟，令Moon開始黑面。兩人索性企埋一邊理論，Moon明顯較激動，不停指手畫腳以示不滿，而Jeannie自知理虧，只能對着Moon苦笑。

睇衫零交流

當Jeannie發覺記者時，即拉Moon掉頭走，更澄清：「我哋唔係嗌交，搵唔到架車咋！」其後兩姊妹只好回到商場找另一個停車場出口，期間仍不忘繼續Shopping，但未知是否Moon尚未下火，兩人揀衫時完全零交流，而且沒有斬獲，最後向記者揮手便離去。