製作黏土及陶瓷相當耍家的葉蘊儀對熊Bear Bear情有獨鍾，年前她更將興趣發展成事業，於其藝術工作室開班授徒，教導粉絲炮製陶瓷版熊Bear Bear，並創新地以餐巾圖案印在熊身上，她笑言製作過程看似複雜，其實非常簡單，更有不少男士專誠上堂為女友炮製送驚喜！

將興趣發展為事業的葉蘊儀，自設工作室製作手工藝品。

對熊Bear Bear情有獨鍾的葉蘊儀，開班教男仔整陶瓷熊冧女。

葉蘊儀表示不時有新人前來特製婚禮用品。

葉蘊儀於外國買入大批餐巾，以供圖案轉印於熊仔上！

工作室擺放不少玫瑰花製成品，令葉蘊儀恍如置身童話世界之中。

白瓷熊Bear Bear

STEP 1
準備好所需工具後，先選取餐巾三層之中最外面、備有圖案的一層。

STEP 2
將圖案餐巾放於白瓷熊Bear Bear上量度位置，並將餐巾剪成小塊。

STEP 3
於熊Bear Bear身塗上一層白膠。

STEP 4
把餐巾貼於塗上白膠的熊上，再塗一層白膠以固定位置。

STEP 5
將小塊的圖案逐一貼於熊Bear Bear身上，切勿將圖案過分集中於同一位置，應平均分配。

STEP 6
完成拼貼程序後，於熊Bear Bear身上添置絲帶及鏈等配飾，製造獨一無二的白瓷熊。

葉蘊儀（Gloria）自小對手作甚有興趣，每逢上勞作堂她亦會分外高興，美術科的考試成績標青。身為熊Bear Bear狂熱分子的她，家中擁有無數Bear Bear產品，上至不同Size的毛公仔，下至擺設及相架等珍藏品均有所涉獵。於外地旅遊期間，Gloria於街道或櫥窗看見Bear Bear蹤影，亦會忍不住停步瘋狂拍照。

置身花花世界

談到為何對熊Bear Bear有情意結？Gloria笑說：「Bear Bear對我嚟講好親切，好似蜜糖咁，好Sweet，好似另一半咁好大隻，又高又軟綿綿，見到就好想即刻攬住佢！有安全感得嚟仲要好Cute，望住佢就會好開心，有咩唔開心都會忘記晒！」

她早年把心一橫，嘗試將興趣轉化為事業，與友人合資於尖沙咀開設藝術工作室，開班教導學生製作紙黏土，由於黏土易控制，亦可天馬行空製作不同形狀的物品，故能輕易吸引客源。其工作室擺放了不少色彩斑斕的黏土Demo，如Cupcake、玫瑰花、蛋糕及相架等，恍如置身童話世界中。

Gloria透露不時有姊妹團來製作花球：「其實花球都幾難整，但完成品會好靚，睇你點襯啲顏色，如果新娘想整，我哋都會建議用簡單嘅花去做，亦有人會訂Cupcake，都唔難做。（花卉好難整？）熟能生巧啫，通常開頭整會建議佢整玫瑰花最簡單！亦有人趁Bridal Shower（新娘賀禮聚會）嚟整，好似簽名筆都會有人整！」

由於客源不斷，Gloria與友人商量後決定擴充工作室，及後她修讀陶瓷課程，火速拍板製作陶瓷版熊Bear Bear！

男女都啱整

由於市面上有不同種類的熊Bear Bear，她忽發奇想，以餐巾上的圖案，透過特製膠水印製於熊Bear Bear身上，她表示意念源自外國：「外國都好多呢個做法，不過多數用喺木度，我就想黐喺Bear Bear度，因為好多人都會鍾意，啲餐巾我會去外國大量入貨，因為實在好多款式，幾個櫃桶都放滿晒！（過程困難？）一般人整兩、三個鐘就可以，最緊要係掌握個接駁位，睇唔到啲駁口位最好，通常未乾就好覺，整完成隻Bear Bear好似自己畫咁。」

雖然黏土與陶瓷各有支持者，惟Gloria認為兩者手工分別不大：「黏土唔使燒，陶瓷就要燒，但就可以用，好似碗同碟咁，黏土只可以做擺設，冇實際用途，香港人鍾意實際，白瓷好玩又用到，當年我做Demo都係自己燒咗出嚟，之後交畀廠大量去做。」

她又表示並非清一色只有女仔來製作熊Bear Bear：「雖然大部分都係女仔，但亦有男仔整畀女朋友。除咗Bear Bear，圖案亦可以畫，多咗樣嘢，黏土比較輕送畀人冇咁好，白瓷就有啲重量，質感好啲！」

溝女？其實唔難！

白瓷熊Bear Bear製作方法簡單，重點是選擇餐巾圖案時要三思，初學者切忌挑選複雜圖案，免得製成品圖案過分雜亂。