王浩信凸襲MK 除剩底褲
擁有一副Fit爆身形的無綫小生王浩信，昨日為藝術犧牲，僅穿內褲的他，與朱千雪及雪妮在旺角拍外景，除上身展現結實肌肉外，更化身成「凸鵰男」大騷「小浩信」，難怪連朱千雪都投降表示，着三點式都唔夠佢嚟！
王浩信着住條底褲孭雪妮姐跑來跑去，大騷「凸鵰」兼胸肌！
被王浩信拖住的雪妮姐，拍到乸口乸面，更要匿喺垃圾堆。
（目及）完王浩信，朱千雪伸晒脷兼投降認輸！
王浩信一身激凸身形，吸引不少人圍觀拍照。
王浩信當街露「凸鵰」，「凸」別警號注意！已為人夫的王浩信是圈中Fit爆型男，不時在微博上載健身照片，令粉絲睇到流晒鼻血，昨日他為新劇《EU超時任務》犧牲色相，在旺角與前港姐朱千雪及雪妮拍外景，劇情講述王浩信除剩條底褲，勇救「媽媽」雪妮，並要拖着雪妮在橫街窄巷內穿插。穿上橙色平腳底褲的他，化身「凸鵰男」，展現「小浩信」雄風，而平日有做Gym的他，更展露出上半身43吋胸肌，難怪在場吸引十多位少女及太太圍觀，齊齊舉起手機，爭相影低做閃卡！
谷肥拍劇冇打底
全情投入的王浩信，沒有受圍觀人士影響，孭住雪妮跑來跑去，雖然雪妮能夠一親王浩信肌佬味，不過她似乎並不享受，更一度乸口乸面，一落地即用濕紙巾抹手，令在旁的朱千雪都睇到眼定定！事後王浩信表示今次赤裸上身是為配合「土豪村長」一角，又直言冇為「小浩信」打底：「唔知着底褲仲可以點打底！依家肥咗十磅，其實之前拍《東坡家事》做摔跤手都除過o架啦！今次監製都叫我盡食，叫我老婆乜都整啲，食腩肉呀、食多兩碗白飯，仲食埋消夜，但我一路食就一路內疚，仲要得一個月時間增肥，我都盡食o架啦！」
被朱千雪兜巴星
拍埋王浩信身邊的朱千雪，自嘲要投降認輸：「今次我輸晒啦！就算着三點式都多布過佢！（再少布啲？）電視尺度應該唔得！」她又自爆之前曾不覺意摑了王浩信一巴：「我哋排緊戲嗰時唔覺意真係打咗佢一巴，太投入啦！」王浩信即自嘲是賤男打圓場：「我個角色係一個賤男，成日都畀佢打，畀人打到最甘都係呢套劇！（畀人打咗幾多次？）真實就一次，其他就唔好提啦！」
