殿堂樂隊太極即將舉行入行30周年演唱會，為令粉絲重拾當年回憶，六子決定歌曲保留原汁原味，又嫌棄上次「男人味」過盛，笑言今次終於請到「鍾意跳舞嘅傻女」歌手沖淡一下「佬味」。

太極於下月舉行入行30周年演唱會，與粉絲重拾回憶。

Joey Tang自認在隊內經常發脾氣。

搖滾樂隊太極將於下月30及31日假紅館舉行兩場太極《The Mega Hit》30周年演唱會，相隔3年再開個唱的原因乃一個承諾：「我哋講過點都想5年一聚，好似15、20周年，不過25周年嗰陣個期有問題，所以去到27周年先做。」這次個唱，六子重新選擇了三面台，皆因接獲不少投訴：「四面台可以同觀眾近啲外就冇好處喇！一來聲冇咁集中，二來朋友以為有靚位，點知成日睇背面！」

搵「傻女」沖淡佬味

對於30周年個唱，他們希望再有新搞作，特意揀選未成立太極前練習的歌曲演唱：「想配合番演唱會時光隧道嘅概念，有啲歌想要番原裝感覺，編曲唔會改，希望觀眾記得嗰個年代，有番回憶。」鑑於上次個唱剛陽味太重，他們預告終於找到女歌手中和一下，並大賣關子：「佢係鍾意跳舞嘅傻女囉！」

即晚解決適可而止

一隊樂隊能維持30年實屬不易，定必有其秘訣，豈料他們笑言全靠「嗌交」，而嗌交更要有技巧：「每次嗌交要即晚解決，仲要適可而止，有人性咁嗌，最後要有個認低威！」提到哪個最常「撩交嗌」？六子一致認為他們只是容易發脾氣而非刻意「撩交嗌」，不過Joey Tang自認容易令人發火，在隊內亦經常發脾氣：「可能我份人比較心急啩！」