吳綺莉繼上月涉虐女鬧上警局後，與「小龍女」吳卓林再爆衝突！月初已搬回與媽咪同住的卓林，前日卻因飲酒與吳綺莉再起爭拗，她向老師傾訴後拒絕回家，到校尋女不果的吳綺莉情緒激動，向本報透露未有跟卓林聯絡！

不知女兒去向的吳綺莉無計可施，顯得相當頭痕！

上月涉虐女鬧上警局的吳綺莉，與15歲女兒卓林事隔一個月後團聚，卓林月初搬回大埔寓所，惟兩母女前日起爭拗，卓林回校後未有回家，而吳綺莉晚上親自到學校了解情況，卻未能得知卓林下落，期間情緒激動，她在校門前講述經過：「卓林話要飲啤酒，咁我都要飲紅酒幫助瞓覺，覺得佢飲啤酒OK。但我話你冇返學好耐，點解仲唔做功課，佢就話老師話冇所謂，又話同學都飲啤酒，咁我有啲唔高興，講咗佢幾句，佢就返學校同老師傾，然後就話唔返屋企。點解要咁整我？I'm Single Mum，要賺錢養家！」

「唔想搞大件事」

她強調不想再驚動警方，更否認因卓林想見成龍致關係惡化，她最終與社工傾談，並留至晚上九時許離開。至十一時許，戴帽的卓林低頭與戴口罩的校長步出學校，卻為避媒體追訪而折返。

經過一晚深思，吳綺莉昨日現身寓所時指卓林拒與她見面，更不知其去向：「18歲以下嘅人唔係想點就點，卓林呢啲年紀係鍾意同朋友及外人講嘢，我都覺得唔可以咁激動，自己係成年人，抖咗一晚都諗清楚。我相信卓林同學校傾得最多，為人師表應該希望學生同家長關係好，亦都相信每個家長係關心自己小朋友，所以我都要冷靜，希望關係可以融洽啲！其實15、16歲嘅小朋友都會咁，總覺得朋友啱屋企唔啱，我都學緊點同佢相處。（點解唔坐低傾？）我哋成年人有時都分唔到好同壞，更何況小朋友！（係咪之前太嚴？）一半半啦，始終小朋友唔管又唔得。（影響到工作？）咁又冇，大人都要做番自己嘢，唔通我同佢一齊癲咩。（有冇聯絡警方？）小朋友唔返屋企我可以報警，但唔想搞大件事！」而有線曾與校方聯絡，問及卓林情況、有否再報警處理及卓林目前是否身在學校，校方均表示未能透露。

「冇話邊個啱定唔啱」

吳綺莉昨晚接受本報訪問時指沒有聯絡卓林，問到為何未能與卓林見面，她說：「我真係唔識分析，嗰間係國際美國學校，大家尺度唔同，冇話邊個啱定唔啱，成件事處理有少少難堪，卓林都好Confused同Upset，小朋友錫媽咪係啱，但方法係咪有問題呢？我同佢始終係一家人，仔女都係永遠嘅。」她更表示從未如此癲，希望大家原諒，並指學校及社工很中立！