無綫今日凌晨重播第一集經典股劇《大時代》，而「丁蟹效應」已應驗，恒指昨日先升後跌，收市下跌558點！幾位圈中股神即趁低入市，包括早前賺了六位數的莊思敏揚言要買車，而股壇新手何佩瑜則去銀行（目及）實個市。

雖然昨日港股收市大跌558點，但莊思敏坦言冇有怕。

睇住呀！

有份入市的Mia笑言最叻殺蟹。

Jeana現身銀行睇實個市，直至銀行關門仍未捨得離開。

經典劇集《大時代》於深夜黃金時段重播，股民所擔心的「丁蟹效應」再現！莊思敏早前長揸港交所勁賺六位數：「我覺得現階段仲係安全同樂觀嘅，預計可以超過三萬點！」但她擔心受「丁蟹效應」拖累：「都要過咗個丁蟹效應先，我之前都放咗少少阿里影業，慶祝趙薇拎影后嘛，都賺咗六位數字！等個市再回番啲再入過。」對於昨日港股收市大跌558點，她揚言冇有怕：「揸住先囉！同佢鬥長命呀，我一定長命過丁蟹嘅！」至於賺到的六位數，她打算買車獎勵自己：「買電動車啦！電動車夏天拍埋一邊可以開冷氣，好用呀！」

另一方面，股壇新手何佩瑜（Jeana）昨午到銀行睇股票，拿着手機左望右望，坦言仍未摸清個市：「之前跟朋友玩咗一排，都有啲斬獲，不過就放咗喇！」提到「丁蟹效應」，她自認「信邪」：「都信o架！所以依家想趁低吸納囉！」直至銀行關門，她仍未捨得離開：「仲係心大心細，要慢慢諗做足功課，心郁郁想買啲大藍籌，好似港交所都唔錯！」

Mia最叻殺蟹

而正考股票金融經紀牌的陳靜儀（Mia）自稱非常留意股市，早前更賺得六位數字：「見好就收！依家就留番幾隻實力股長揸！唔理咩丁蟹喇，大閘蟹我就知！其實我最叻殺蟹，不過依家個市咁波動，睇定啲好！」至於雨僑表示冇炒股癮，但見文詠珊早前勁賺近百萬亦「跟風」：「今日急急打畀財務顧問買股票入市，攞10萬小試牛刀，唔敢玩得大，因為賺錢好辛苦。」