「夢想不怕大,做夢者不怕小」!為了追夢,歌手陳慧敏一個人從澳門搬到香港居住,雖然曾經歷大大小小的困難,但她懂得自我調節,從挫敗中成長。一路以來,她未有忘記當初音樂對自己的影響,更立志要透過音樂去發放正能量。

孤身由澳門搬來港居住的陳慧敏,為追逐Sing夢曾經入不敷支!

陳慧敏Keep住童真和一股傻勁,以捍衞自己的真心。

性格樂觀的陳慧敏,懂得從挫敗中成長,將恐懼轉化為勇氣。

陳慧敏(中)《超級巨聲》後曾感到前路茫茫,幸得主持田蕊妮的提點,令她反省和改善缺點。

陳慧敏(右)曾在十大中文金曲頒獎禮,奪最有前途新人獎優異獎,與優秀流行歌手大獎得主薛凱琪合照。

陳慧敏(慧敏哥)最近推出了一首由自己作曲的正能量之歌《小人物》,希望為各位覺得自己是Small Potato的人傳遞力量:「我發現好多人都會覺得自己成就唔到咩大事,但其實每個人都可以喺自己嘅領域做得好好,唔應該睇小自己!」但她坦言並非百分百樂觀的人,不時會有驚青的一面,全靠自我調節去面對困境,其中音樂就為她帶來無比能量去繼續前行,亦激發起她對創作歌曲的熱誠,希望以音樂去幫助其他人:「我知道有好多人同我一樣都好驚,《小人物》呢首歌出咗之後,我收到好多人嘅故事。有人話本身好驚考大學,因為父母反對佢考啲冇咩前途嘅科,但聽完首歌之後,佢哋就覺得其實冇咩需要驚,做咗先講!所以我唔係樂觀底,但我係識得將恐懼轉化為勇氣嘅人!」

山窮水盡 入不敷支

問到曾否經歷過很大的挫折而久久未能平復?慧敏哥笑言自己的優點是善忘,有一個「自動刪除掣」,可以把痛苦的記憶洗去。但提到挫敗感,她透露在《超級巨聲》比賽後曾感到前路茫茫,而且支出與收入不成正比:「嗰時山窮水盡,但又要不停不停咁支出!」一向予人弱不禁風感覺的慧敏哥堅持追夢,難免令父母擔心,而這種擔心同時成為了她的動力和壓力:「因為我想令佢哋享福,所以會更加努力去工作,而壓力就係因為我呢一刻未做到!」

學做家庭「煮」婦

慧敏哥之後孤身由澳門搬到香港居住,她坦言曾經懷疑過自己的決定,但認為如果想在香港發展,就應該要在這裏扎根,更希望可以藉此鍛煉自己。而她首要面對的問題,是要在經濟條件不足的情況下支付昂貴的租金,以及學習如何成為一個全職的「家庭主婦」:「水、電、煤呀!所有屋企嘅大小事務,買任何零碎嘅家庭用品,點樣打理好一個屋企,所有嘢都係好需要學習嘅!」

雖然獨自生活要面對很多問題,但平日要自己下廚的她因而練得一手好廚藝,更自誇廚藝愈來愈好:「我之前同過其他Artists一齊住,都有煮過嘢畀佢哋食,佢哋都有讚過我嘅手藝!」她認為煮菜並不是想像中困難,只要有好的食材和適當的處理已經可以很美味。

食好嘢尋戀愛滋味

回顧入行至今,慧敏哥覺得自己成長了不少,提到當時參加《超級巨聲》時,主持之一的田蕊妮曾經跟她說:「你可唔可以唔好成日咁懵或者講唔知?」這句說話令她開始慢慢反省和作出改善:「我發現自己依家講少咗好多『我唔知道』,呢個成長係令我覺得最欣慰嘅!其實我由細到大都唔係一個有啲咩大理想嘅人,但直至參加咗歌唱比賽之後,就搵到我嘅人生目標,而我為咗呢個夢想,亦有不斷咁修正自己。」有人會認為成長等於要放棄童真,但慧敏哥覺得做人有需要保持着童真和一股傻勁,以捍衞自己的真心:「小朋友好容易就做得到,但唔知點解人大咗好多嘢都會兜圈,又會畀好多障礙自己,所以要提醒自己要從心出發,想做就去做!」

而提到感情事時,現時單身的慧敏哥直言想拍拖,又透露入行後亦有過喜歡的對象,但自己是事業型女性,所以會以事業行先。問到會否因此感到寂寞?她即笑言會靠吃東西去代替愛情的感覺:「我好鍾意食嘢,我覺得食到好味嘅嘢好幸福,就好似談戀愛一樣!」

小人物發放大能量

愛畫畫的慧敏哥大學時修讀設計,曾夢想擁有自己的Design House,現在希望音樂和設計可以同步。她又稱之後推出EP會參與圖像設計,與大家分享更真實的自己:「歌入面同時有畫,又有自己嘅文字同聲音,嗰種分享令我好喜悅!」

慧敏哥特別為《小人物》一曲設計了宣傳品,用小小的圖畫去表達正面的訊息:「封面上面有個冬菇頭嘅女仔就係我嚟,佢蒙住對眼同拎住支咪,因為唔想畀外界嘅因素去影響到自己嘅心!而呢首歌有Power Sending嘅作用,之後個女仔就用咗啲樹葉去飛喇!雖然只係好小嘅Graphic,但希望大家可以相信自己嘅能力!」

後記:勿忘初衷 不被世界改變

「我們未必能改變世界,但至少我們可以不被世界改變。」可能因為大家都是年輕人,所以慧敏哥的說話,小記很多時都感同身受,特別提到人需要有童真去提醒自己要從心出發,就令小記想起這句說話。

雖然慧敏哥寫的歌未必可以為大家洗腦,但最值得欣賞的是他對音樂的熱誠是不會輕易被動搖!而小記亦希望自己和慧敏哥都能做到不被世界改變我們的初衷,共勉之!