屢爆吸毒疑雲的女歌手Rihanna，日前流出一段疑似吸食可卡因的短片，即被網民狠批教壞細路，她隨即上載短片發火澄清，辯稱只是大麻捲煙，但原來當地並非合法，今次仲唔一身蟻！

現年27歲的天后Rihanna連日來現身Coachella音樂節狂歡，但玩出禍爆出「吸毒醜聞」！根據網站Complex.com日前報道，一段Rihanna於音樂節開P的短片流出，其中可見她的親友Leandra與Melissa Forde在鏡頭前扭籮跳舞，Rihanna則坐在後面、手上拿着可疑的「白色管子」。鏡頭一度移開，Rihanna再入鏡時已見她用手按實鼻子，故被懷疑吸食可卡因！

網民斥教壞年輕人

雖然短片已被刪除，但仍引來不少網民喪插Rihanna的行為：「佢咁做會令好多無知嘅年輕人以為吸毒好型！」又鬧她不負責任。面對種種指摘，Rihanna終忍不住於Instagram上載同一場合拍下的短片作解釋，但片段清楚可見「白色管子」原來是「大麻捲煙」，她還爆粗留言：「有眼嘅都知道嗰支係大麻捲煙啦！邊X個會用鼻食煙草！」不過，音樂節在加州舉行，當地吸食大麻並非合法，今次Rihanna自認食大麻，認真知法犯法！

Justin築人牆撞DJ

一波未平一波又起，電台DJ Ryan 'Fitzy'Fitzgerald前日踢爆於音樂節上跟加國麻煩小天王Justin Bieber發生肢體碰撞：「我掛住低頭傾電話，行行吓撞落一面由保安築成嘅人牆，前面企住一個矮小嘅Justin，之後佢出手推我，我就忍唔住話：『你冇嘢呀？我身形大你兩倍！』就畀保安捉實我個背囊同掟向圍欄。」不過，Justin一於懶理，日前與韓國女團2NE1隊長CL等好友拍片惡搞歌手Carly Rae Jepsen的新歌，邊Chok鬼臉邊咪嘴扮唱。