「宅男女神」周秀娜自從與花心前度陳偉成分手後，感情方面一直沒有着落，昨日她出席活動時自爆有追求者，而且布滿世界各地，還預告可能下月生日會有新歡慶生，笑言香港人會優先考慮。

穿上白色露背裝的周秀娜心情勁靚，更預告下月生日或有新歡相陪。

愛靚唔愛命的娜姐，不顧左腳包紮着，仍穿五吋高跟鞋。

周秀娜昨日與森美一同出席活動。

周秀娜昨日以白色露背裝出席活動，同場還有森美。只見娜姐左腳包紮着，走路時小心翼翼，但仍穿着五吋高跟鞋，她解釋是韌帶舊患，自嘲愛靚唔愛命：「醫生話唯一方法係靜養同休息，唔好郁等佢自己康復，但我一路喺北京拍戲冇停過。」

香港男士優先

下月便踏入29歲的娜姐表示，人生最後一年2字頭生日，還未計劃如何慶祝，希望30歲後一切更加好，包括感情，她笑說：「可能到時（生日）有新……新男朋友呢！（依家有追求者？）有，了解緊。（北京定香港？）世界各地都有，但好少時間相處，所以香港會優先啲，因為有多啲相處空間。」

夥欣宜拍新片

此外，她又透露將會跟欣宜拍攝一部有關女性題材的香港電影，問到會否性感演出？她說：「性感唔緊要，最緊要題材，拍之前都會同導演彭秀慧傾吓偈，我乜角色都想演。（演感情坎坷做番自己？）我唔覺得自己坎坷，感情實有開心唔開心，冇話順唔順利嘅！」