吳雨霏婚後未有減少幕前工作，除了做音樂外，又接觸時尚範疇，她坦言透過喜愛的事情找回以前欠缺的自信，又指老公是功臣之一，言談間流露出幸福，事業愛情兩得意的她名副其實「讓世界艷羨」！

Kary初入行時經常缺乏自信，幸後來學會做開心的事來尋找自信。

Kary認為做音樂要與視覺元素配合，故開始參與造型設計。

榮升「洪太」後的吳雨霏（Kary）繼續為歌唱事業打拚，早前推出了最新大碟《艷羨》，大玩七十年代至現代的曲風，她表示平日愛聽舊歌，因可以從中獲得靈感：「其實依家聽好多嘅歌都係受以前好多唔同年代嘅音樂影響，所以先攞到咁多Inspiration（靈感），今次覺得玩唔同嘅年代可以發揮到好多嘢，無論音樂定造型上。」

開騷搵自信

而專輯同名歌曲《艷羨》希望鼓勵大家要有自信、做自己，不過Kary坦言剛入行時非常缺乏自信，現有的自信全靠時間和努力慢慢累積而來：「我會做啲令自己開心嘅嘢去搵番自信，例如我做到一個紅館騷咁，我可以喺嗰個騷度攞到好多自信，大家亦都畀到好多鼓勵我，覺得我係得嘅。」

而她的另一個自信來源，必定是身邊人的愛，Kary甜笑透露在老公心中自己永遠是最好：「無論我做啲咩佢都覺得我最好、我最靚，令我好感動！喺佢面前我可以做番自己，唔需特別修飾啲咩佢都係咁錫我！」她又表示間中仍會有膽怯的時候，但會提醒自己不用理會他人的目光，最重要是做好自己。

行Catwalk新鮮

此外，Kary早前獲邀出席米蘭時裝展，又試過將新碟的試聽會與時裝展融合一起，並充當模特兒行Catwalk，她坦言一切都在意料之外：「我從來冇諗過去到米蘭，又冇諗過可以行Catwalk，對我嚟講好新鮮！我以前係會踢拖出街就算，慢慢發現Fashion有佢好玩嘅地方，係另一個方法去Express（表達）自己！」Kary又認為現時做音樂要與視覺元素配合，所以亦有參與造型設計和MV的故事大綱。