英皇小花冼色麗將於舞台劇《香港有個Bollywood》，飾演情緒波動兼經常大嗌的經理人，每日排練八個鐘的她最擔心聲帶再次發炎，更欲找黃秋生惡補演技！

每日排練八個鐘舞台劇的冼色麗，最擔心嗌到聲帶發炎。

冼色麗原本與導演認真對劇本，惟一到五點即被導演笑漏電。

張崇德與冼色麗扮過氣巨星及經理人，有不少對手戲。

冼色麗打算向黃秋生學戲。

英皇小花冼色麗（Bonnie）本月再踏台板，與張崇德假香港文化中心劇場上演喜鬧劇《香港有個Bollywood》。張崇德於劇中飾演過氣天王巨星，Bonnie則扮演不離不棄的經理人。現實中性格斯文的Bonnie今次要挑戰其一大弱項，嘗試做個八面玲瓏、性格主動、兼且情緒起伏較大的經理人：「要面對呢個咁難湊嘅藝人，又要處理佢嘅前妻、女兒，仲要識得同記者Social，真係覺得做經理人心力交瘁，令我好佩服啲經理人，自己都嘗試喺唔同經理人身上觀察佢哋嘅小習慣！」

怕聲帶發炎

2011年初演舞台劇《秒速18米》時，Bonnie「出師不利」聲帶發炎，故她今次最擔心聲帶問題：「上次做舞台劇唔識控制聲帶，結果聲帶發炎，喺台上咳到幾乎演唔到！今次角色更加歇斯底里，要抓狂加上細場演出唔裝咪高峰，喺劇度我好多時都要嗌，依家每日排八個鐘，一到下午五點鐘左右，導演就話『睇見Bonnie明顯冇晒Energy』，依家惟有每日沖參茶養聲。」

「裸」膽靠劇本

談到「Bollywood」不乏歌舞表演，Bonnie卻指未有跳唱演出：「我想唱都冇得唱！相信練過我都得，以前幕前都試過，但我都會驚。（下次想演乜？）我想試吓演歌舞劇，演兩下又唱兩句，好開心。」提到舞台劇演員焦媛曾裸露演出，會否性感上陣？她說：「唔會！喺現場咁樣我會怯！（為藝術犧牲？）暫時未有呢個想法，可能第時碰到好嘅劇本或班底先夠膽。」雖獲導演大讚背稿快，但她自言肢體動作較弱，想向黃秋生惡補演技。