吳鎮宇於新片飾演充滿正義感的火爆賊佬，現實中的他同樣不平則鳴，他笑言兒子遺傳了其性格，極富正義感兼通情達理。提到新片主打男人戲，他非常享受，並指與女星合作未能暢所欲言更Dry！

正所謂「男人的浪漫」，吳鎮宇很享受與男拍檔暢所欲言的時間。

鄭浩南（左起）任達華、吳鎮宇及譚耀文因拍攝《衝鋒車》結成好友。

吳鎮宇於英皇電影《衝鋒車》中飾演火爆賊佬，與兄弟任達華、譚耀文及鄭浩南等扮警察，將小巴改裝成衝鋒車「做世界」，期間卻遇上真悍匪。電影包裝成黑色幽默的港式警匪片，鎮宇大讚題材得意兼感覺懷舊，令人回想起香港往昔的風光年代。

難為正義定界線

對於電影以男人戲為主，他笑言比拍愛情片更享受：「四個男人朝見晚見，幾乎每場戲都係o架！聽落好Dry，但其實有女仔仲Dry呀！因為話題冇咁暢所欲言！華哥有好多嘢講，令大家好快熟落，有時拍夜戲，佢為咗令大家唔好瞓，會撩大家傾偈。（最難忘邊場戲？）好多o架！例如要即刻學打保齡球，原來我天分都OK！」

片中鎮宇的角色充滿正義感，現實中他亦是「有嗰句講嗰句」，但他認為現今對正義的定義愈來愈模糊，很難在一個人身上看到絕對正義，因此可能要在電影中追尋：「依家會覺得正義唔一定下下出聲，你行動得就要確定自己真係啱，有個心係好，但唔會再好激烈咁付諸行動。」

兒子遺傳使命感

問到六歲兒子Feynman有否遺傳其正義感？鎮宇笑說：「都有o架！但唔會樣樣做出嚟，佢會講道理，例如佢有次想繼續出街，但我話司機要收工，人哋都有小朋友要陪，佢就明晒！」