吳若希母親昏迷十天，連日來心情沉重的她，對母親的反覆狀況頗為擔憂，猶幸昨日終有新進展，其母不但可張開眼，亦能做出握拳等動作，對Jinny來說可謂天大喜訊！　

吳若希和細佬一同到醫院探媽咪。

歌手吳若希（Jinny）母親上月二十八日因炒單車重傷入院，Jinny為此一度哭成淚人，但一直對母親能康復甚有信心。吳母連日在深切治療部（ICU）治療，未見太大進展，幸而昏迷了十日的吳母昨日終於甦醒，令Jinny放下心頭大石！

吳母的男友黃先生於下午五時十五分到達ICU，Jinny二十分鐘後與弟弟抵達，問到是否會約見醫生詢問母親狀況？她說：「醫生冇打畀我，所以未知。」她的好友Kellyjackie亦在稍後時間出現，她大讚Jinny十分硬淨。

稍後Check視力

Jinny在病房逗留至晚上七時二十分，由憂變喜的她透露母親的情況有很大突破：「佢依家可以擘大隻眼，同我哋都有互動，望到我哋每一個，又聽到我哋講嘢，同埋握拳頭，左右望呢啲動作都做到！媽咪左眼受傷，有試過叫佢擘大，但要等之後進展再好啲先可以Check吓視力有冇受損！」母親甦醒是否很大感觸？Jinny說：「梗係啦！日日自言自語咁多個鐘，依家Feel到原來講嘢係有用，我有讀晒大家寫畀佢嘅信！」她又透露護士稱若母親有意識，稍後可嘗試拔呼吸喉：「之前講過媽咪可能要做啲小手術去幫助呼吸，但依家佢醒番，就唔使喇！」至於母親何時可離開ICU？她表示要與醫生見面後才知道，又稱母親的昏迷指數是三至四度，要到五至六度才算清醒。

不考慮轉院

問到情況好轉後會否轉院？Jinny說：「唔會喇！呢間醫院腦科比較勁，同埋有睇開嘅醫生。（藝人有冇優待？）唔係好覺，大家都得到應有嘅照顧！」她很感激大家的支持和醫護人員對母親的照顧。而Jinny其後在Instagram上載與母親手拖手的照片，並寫道：「醒來就好了！」

此外，神經外科專科醫生藍明權表示：「吳母由深層昏迷到半昏迷狀態，有好大進步，現階段物理治療可幫助手腳血液循環，屋企人多傾偈亦有助意識恢復。」