藝人張紫櫻（車車）早前到英國旅行，首次踏足英倫，第一次見到真雪，又睇聯賽盃決賽，更被神秘人獻吻再「勒索」，令她此行充滿難忘回憶。

車車入場欣賞車路士對熱刺比賽，更落力地為車仔打氣。

遭神秘小丑男吻手背還要畀錢？車車話睬佢都傻。

車車說：「今次80人一齊去英國睇波，真係『有今生，冇來世！』我第一次現場睇聯賽盃決賽，溫布萊球場真係好大，現場睇波好震撼、興奮、激昂，我感觸到眼泛淚光！車路士同熱刺啲球迷，雖然被警察隔開，但兩邊不斷『問候』對方，但都比我想像中和諧，我鍾意車仔（車路士），好開心可以坐喺車仔區，遺憾係無法親親莫連奴（車路士領隊）。我哋又去咗英超球隊昆士柏流浪嘅訓練場參觀，踩吓草地，都叫做落過場吖！最開心係英國出名成日落雨，但當日好好天，好感恩！」

車車又指旅途上有另一個「第一次」：「今次喺英國仲見到真雪，以前冇機會見，我開心到即刻用手執起啲雪嚟玩，不過今次都發生咗件激氣事，我去Waterloo Bridge，影影吓相，有個小丑裝扮嘅人走埋嚟話要同我影相，之後要我畀20英鎊佢，咪即係2百幾蚊港紙！佢仲捉我隻手錫咗啖，咁樣收我廿鎊？係咪搞笑？我梗係冇睬佢，我希望提醒其他遊客都唔好就範！」