歌手周柏豪成為廣告界新寵兒，短短四個月接了共六個廣告，在最新一輯廣告中，只需在鏡頭前後擺Chok Pose、食拉麵、晒半裸、被女圍兼封「暖男」就穩袋百萬，原來其激凸身材更被內褲品牌垂青，柏豪更定下「露鳥期」叫Fans期待！

周柏豪以運動Look做掌上壓，「出力」吸金！

斯文造型Sell陽光笑容，周柏豪冧女冇難度！

周柏豪的新廣告花了幾日拍攝。

日前周柏豪袋七位數字酬勞及接謝安琪棒，以首位男代言人身份拍攝新一輯屈臣氏連鎖店廣告，片中他分別以斯文、運動、冧女及半裸Look示人，問到露胸肌時是否令全場女工作人員尖叫？他笑住說：「其實幾日拍攝期間，無論有冇着衫，都時不時有人尖叫，仲封咗我做『暖男』，話我又潮又型喎！（係咪又被人瘋狂集郵呀？）少少啦！都同咗半百人影咗合照。」

狂拍廣告吸千萬

至於半裸上陣可有加價？他說：「價錢係『Look Good，Feel Great』，其實為咗拍呢個鏡頭，都有特別操Fit啲。」

據知由年初開始，柏豪分別接拍港鐵、連鎖店、牛仔褲、運動裝、相機及保健產品廣告，現時還有三、四個廣告在斟洽中，每個七位數字計，收入近千萬相當好賺！

未夠碧咸咁Fit

據知早前柏豪在電影中全裸演出後，惹來內地內褲廣告商以超吸引價錢利誘，他直說：「係呀！不過我同公司覺得未係時候，因為碧咸同何潤東嗰輯內褲好Fit嘛，等我再Fit啲先，呢百萬廣告錢唔賺住。」問到可會抗拒拍女性衞生用品廣告？柏豪表示身邊有媽咪及女性朋友，女性衞生用品也是日常所需，故絕不抗拒。