藝人陳浩民昨日偕老婆及大女看兒童音樂劇，已有三名乖寶寶的他笑言：「去親旅行就會有『意外』！」提到內地要求拍劇藝人進行驗尿測試，浩民笑說：「驗埋屎都得呀！怕乜？」

陳浩民帶同老婆及大女看音樂劇，享受天倫之樂。

洪天明和兒子洪大仁咀嘴晒溫馨，真係父子情深！

藝人陳浩民與太太及大女、洪天明與兒子及譚玉瑛等，昨日到九龍灣展貿中心欣賞「芝麻街音樂劇《Elmo Makes Music》」，陳浩民表示囝囝發高燒至40度，為安全起見，決定把他與年紀尚輕的細女留在家中休息。

外遊易生「意外」

雖然3歲4個月大的大女變相可獨霸父母，但他指大女思想單純：「小朋友未學識呢啲嘢，佢哋平時相處好和諧，頂多攬住拳打腳踢。（生咗三個，仲想再生？）以前我會覺得一個夠晒數，點知每次都係『意外』，去親旅行就有『意外』，養多一個分別唔大，錢仲係其次，愛心最緊要！（又有咗？）隨緣啦！」

對於內地要求拍劇藝人進行驗尿測試，浩民笑說：「驗埋屎都得呀！怕乜？（支持呢個做法？）冇問題吖！涉毒演員會令套劇冇得播，投資方會損失好大，雙方喺公平嘅情況下做測試，唔算係霸權。」

天明指盈盈「不嬲都肥」

而洪天明透露太太周家蔚將於下月生B，為免弟弟出世令大仔洪大仁呷醋，天明有意為弟弟送一份禮物給哥哥，他說：「我去親開工，個仔都會話：『Daddy No返工，Come Back！』」又拒絕透露錢嘉樂是否快再做老竇：「你哋問番佢，不過佢（湯盈盈）不嬲都肥。（嘉樂冇透露？）冇，真係嘅佢會公開講，上次佢都好遲先講啦！」