任賢齊以逾百萬身價帶同一對寶貝仔女拍廣告，雖然三人組變成廣告界的搶手貨，但小齊要基於四大原則作考慮！兒子拍攝時一度扭計，小齊即以雪糕作冧招，乖仔即刻在鏡頭前變得乖巧。

小齊在廣告中與兒子Cody踢波玩到癲，精力無限！

小齊的女兒Rati雖首次拍廣告，但不時一Take搞掂。

今次因撞正假期，小齊才可以親子檔上陣。

小齊指兒子性格搞鬼，拍攝時不時Chok萌樣。

圈中慈父任賢齊帶同女兒Rati與兒子Cody拍攝內地鞋履廣告，其實Cody已非第一次與小齊父子兵上陣，反而姊姊Rati則是首次出鏡，據知有逾10個廣告搵小齊親子檔拍攝，小齊說：「我要睇幾樣，廣告係咪健康、唔影響學業下、仔女願唔願意同老婆批准。」今次廣告拍攝期正值學校假期，沒有阻礙小朋友上課，加上廣告商碌友情卡邀請，小齊遂問准老婆大人點頭才答應，他說：「將來會唔會再拍就睇情況，我都係希望小朋友過正常生活，賺錢就由我呢個爸爸嚟擔起就得喇！」

雪糕化解扭計

據知，今次小齊與仔女拍廣告的身價高達七位數，他自爆拍攝時兒子Cody一度扭計要食雪糕：「所以將佢拍廣告啲錢用咗嚟買雪糕食！」Cody在拍攝現場好似電兔不停跳，連小齊也笑說：「似我細個咁。」姊姊Rati則似媽媽較文靜，但導演讚她有天分，經常一Take過便搞掂。今次廣告以微電影形式推出，內容講述做大明星的小齊即使工作繁忙，仍會抽時間帶小朋友去公園玩、購物，恍如小齊的真人故事。

被追訪照去街

小齊的一對子女長居香港讀書，不時成為追訪目標，早已習慣的小齊也不禁說：「佢哋都習慣。」他覺得不應該因自己的公眾人物身份而奪去小朋友應有的正常童年生活，不讓他們出街玩或出席公眾場合：「我成日去接佢哋返學放學，呢啲係正常爸爸要做嘅事！大家都對我哋好好，唔會好騷擾，影完相都走。」