栢芝接戲簽協議失場賠鑊甘

身為Neway二太子薛嘉麟太太的諸葛紫岐（Marie）自資組成娛樂公司，頭炮是投資逾億的四個女人的愛情故事電影，更邀請張栢芝擔任主角，但栢芝早前被前經理人陳嵐炮轟拍戲扮大牌失場，有欠專業，當時引起連串怒罵，並立即把她飛出正拍攝的電影，揚言永不錄用。栢芝事業受影響，唯獨Marie仍然支持她，只因曾與她合作電影《最強囍事》，十分欣賞她，覺得栢芝獨力湊大兩子好堅強，雖然外界有負評，但仍被栢芝感動，更因栢芝首度與老公薛嘉麟嗌大交。

薛嘉麟拍枱：唔係鍾意就得

Marie與老公人前人後很恩愛，婚前婚後從不嘈交，據知不少電影人勸告他們不要用栢芝，薛嘉麟以生意角度分析，認為風險過高，恐太太億元投資分分鐘凍過水而多番規勸，但Marie堅持己見令老公不滿拍枱，近期日嘈夜嘈，更冷戰一星期！本報致電薛嘉麟問及與老婆嘈交，他說：「做嘢有唔同意見好正常，拍枱唔出奇，只要公還公，私還私，唔好將公事帶番屋企。」又說：「做生意要謹慎，唔係自己鍾意就得，要作多方面評估市場因素等等，唔可能鍾意就做，咁樣唔係做生意。」

力排眾議撐單親母

雖然老公不滿，但揸Fit人仍然是Marie，她力排眾議撐栢芝，但鑑於此片還有其他投資者，故要求栢芝簽一份協議書，內容是她不能失場，要恪守專業操守等多項條款，如違反要賠天文數字！據知栢芝公司願意簽下協議。據知電影的四個女主角除栢芝外，更有台灣女星郭采潔及內地女星楊冪。本報亦就此聯絡Marie，她承認與二人接洽中：「係傾緊，詳情唔方便透露，遲啲等記者會公布。」至於與老公鬧交，她承認為此而不開心。