「翻版薛凱琪」劉沛蘅（Hillary）當初貪得意入行，誤打誤撞當了模特兒多年，結果愈做愈沉迷！但正值花樣年華的她不會因工作而放棄戀愛機會，正期待下一個Mr.Right來臨！

Hillary貪玩入行，點知愈做愈「模」上癮！

愛情同事業一樣重要！Hillary正期待新戀情。

Hillary是喜歡笑的女孩，演哭戲就要練多啲喇！

現年23歲的劉沛蘅（Hillary）早於學生時期加入模特兒行列，至今已達七年，初時貪得意入行的她不料愈做愈沉迷：「當初膽粗粗自薦到模特兒公司，抱住玩玩吓嘅心態，覺得呢行好得意，好多新奇嘅嘢未試過，點知咁好彩畀依家嘅經理人揀中，最後入咗呢間公司！」

開Brand搞時裝

受家人影響而修讀酒店管理的Hillary，入行前並無其他工作經驗，她說：「我嗰時一路讀書一路做兼職Model，讀完書後好想入番呢行，所以開始全職做Model。」問到會否想衝出圈外闖闖，她說：「唔得啦！我已經做到停唔到，好想繼續喺呢行發展，仲有好多嘢未試過，想浸耐啲學多啲！不過除咗Model之外，我都有開時裝Brand，睇吓遲啲可唔可以做老闆娘！」剛踏入羊年，Hillary渴望能在工作上有所突破：「好想新一年多啲機會參與電影、電視劇，好多朋友都拍緊劇，成日同我講好好玩，好想試吓！我諗Sweet啲、比較開朗嘅角色我都OK，我本身好鍾意笑，如果要喊嘅話就難啲，依家仲學緊！」

拍拖睇第一感覺

Hillary去年底與男友分手，問到當初怎樣結緣，她尷尬地說：「係網上識嘅，之後開始傾偈，有出嚟食吓飯，之後就一齊咗。」她與前男友已拍拖四年，可惜因性格不合、工作時間等問題分開，問到現在是否準備好迎接新戀情？她笑說：「我Ready喇！（揀圈中人？）冇話圈內圈外嘅，只要個人好、性格夾、錫我就得，我好睇第一感覺，真係冇咩特別擇偶條件。」問到怕不怕戀愛影響工作？她說：「公司好Free，冇話唔畀拍拖，而且我覺得只要時間分配得好就OK！」