音樂人吳國敬被傳會於下月紅館開騷時向女友求婚，對此他雖表示不會刻意，卻漏口風稱可能「忽發奇想」示愛，更冧爆稱近年所有情歌都是作給女友！今次開騷阿敬更獲鐵膽BIG FOUR力撐，粉碎不和傳聞。

阿敬「預告」會在演唱會上深情示愛，認真甜蜜！

阿敬與女友不時人前晒恩愛。

下月於紅館舉行《敬。愛音樂吳國敬30載作品展音樂會》的吳國敬，有傳會在演唱會上向相戀8年的女友求婚，對此阿敬說：「當然，觀眾好想睇嘅，我女朋友可能都好期待。咁喺我嚟講到時可能忽發奇想講我愛你，但刻意地造作就唔係我嘅嘢。」阿敬歷年來創作經典歌曲無數，問到可有為女友作曲？他說：「我入行30年，同依家女朋友拍咗8年拖，喺我以往幾十年人生有好多起起落落，好多喜怒哀樂人生感覺，令我作品同唱歌有Feelings，其實係生活體驗嘅累積！最近閉關寫嘅慢歌，作嗰時都係諗住佢，個感情係好深厚，唔係一首歌，所有歌都係作畀佢！」

BIG FOUR不和炒作啫！

阿敬音樂會的嘉賓陣容強勁，包括天后級的陳慧琳及黎瑞恩，而BIG FOUR更是鐵膽，他說：「喺台前面承諾過，無論邊個開騷大家都會撐！」提到不和傳聞，他說：「BIG FOUR組成嗰個年份我係一個幕後人身份，近呢一兩年就用番唱作人身份。其實BIG FOUR個組合好Perfect，能夠成為BIG FOUR演出嘅鐵膽都好榮幸！其實不和係炒作啫！不和仲點會見？」