最近人氣勁升的陳嘉佳前日拍攝電影海報時遲大到，令呆等四粒半鐘的攝影師Sunny無名火起，並將事件放上網公諸於世，更指對方未有道歉兼大搖大擺，鬧爆她是「最大份明星」！

細細粒因家事遲到4粒半鐘，連累工作人員及攝影師Sunny呆等。

Alice B.

前晚Sunny於Facebook上載陳嘉佳（細細粒）的相片並留言：「約四點半，九點才到。」事緣當日Sunny負責為導演葉念琛拍攝電影海報，惟等極細細粒都「冇影」，他說：「係幫葉念琛影海報，白等佢四個幾鐘，嚟到道歉都冇句，仲大搖大擺！」

解釋屋企有事

他又表示工作人員久候不果，直指細細粒是「最大份明星」：「我只想講，你嘅時間就係時間，工作人員都係時間，要我哋乾等好忟，佢係最大份明星！」惟細細粒堅稱早已通知劇組，她說：「屋企臨時有事，可能溝通上有問題，解釋唔到咁多！」

Alice B.塞車失場

另外，模特兒Alice B.原定昨午與趙頌茹出席大埔的復活節活動，卻遇上大塞車，至活動開始仍未趕到現場，最終被大會Out走。對於遲大到，Alice深感抱歉，她事後解釋：「我已經搭的士，仲喺的士上面換衫，但都趕唔切，我發誓下次唔會！原本去到大埔，之後原車返回，司機見到咁，都收平咗我。」