劉青雲為拍新戲「毒打」葉璇，他大爆事後竟獲葉璇道謝，非常出奇！有份角逐「金像影帝」的他以平常心面對，自覺演出盡力已無憾。

劉青雲於新片「毒打」完葉璇後，竟收到葉璇致謝，認真出奇！

曾患抑鬱症的Fiona感激母親一直不離不棄。

劉青雲與薛凱琪（Fiona）昨日出席新片《暴瘋語》記招，於戲中扮演精神病患者的青雲談到拍攝過程時表示，最難忘是向拍檔葉璇「施毒手」﹕「講我打佢，最終更掟佢落街！拍嘅時候佢墊晒Pat，但咁嘅撞擊好難避免受傷，估唔到佢好捱得冇出過聲，最後仲話好高興能夠同我合作！」青雲為角色造型更剃掉1/3的招牌粗眉，實行為藝術犧牲！

唔介意「癲」畀老婆睇

劉青雲憑《暴》片及《竊聽風雲3》角逐今屆金像獎「最佳男主角」。談到信心如何？他說：「要睇評審，不過《暴》片嘅角色我比較少演。作為演員拍好晒戲就走，最緊要導演覺得OK啫！」他又表示不介意太太郭藹明入場欣賞其「癲樣」﹕「佢了解我嘅演出，我哋好多嘢都會攞出嚟傾！」

Fiona感激媽咪不離不棄

至於Fiona於戲中則與患有精神病的黃曉明扮演戀人，她感同身受地說：「明白呢啲病會令身邊人好辛苦、好大壓力！記得當初我有抑鬱症，我媽咪喺壓力邊緣，但對住我扮冇嘢，當時嘅我自殘、撞牆乜都試過！」談到林欣彤疑遭家暴時，她說：「愛一個人邊度打得落手？我會去關心吓佢，印象中佢係一個好Sweet同Nice嘅女仔。」