影帝張家輝昨日在香港國際影視展連趕兩場，並為英皇電影活動擔任壓軸神秘嘉賓。備受重視的他與英皇老闆楊受成打手印，大合照時更獲安排企中間位置，全程表現風騷的他甫上台即高呼：「楊仔喺邊？呢次你真係筍啦！」楊生笑說：「走咗之後冇大冇細，成日叫我楊仔。」雙方將合作兩部電影，又笑言要開拍《魔警2之韓江傳》。

張家輝（右）與楊生齊齊打手印，笑到四萬咁口。

大會席上又宣布15部電影大計，包括張敬軒的《燦爛這一刻》、李準基和周冬雨合作的《西西里艷陽下》、彭于晏和崔始源合作的《破風》等，林嘉欣亦重返影壇與張學友合作，參演老公袁劍偉執導新片《暗色天堂》。

此外，家輝昨日偕蔡思貝及張繼聰等出席電影《陀地驅魔人》活動，身兼導演及男主角的他自爆為該片剃頭，遭女兒嫌棄造型核突！