歌手柳妍熙近年愛上瑜伽，成功提升柔軟度的她直認有助唱歌及跳舞，最重要能踢走拜拜肉及腩肉，終極目標是做出將雙腳擺到頸後的高難度動作！不過最意想不到的是旺埋桃花，曾有男士相約她做瑜伽，可惜時間遷就不到錯過「拍拖」機會。

第1招：Upward Facing Dog
伸展位置：胸部、腹部
柳妍熙在導師幫助下做出各個難度動作，輕鬆過關！

第2招：Half Fish
伸展位置：臀部外側、背部

第3招：Gate Pose
伸展位置：大腿內側、腰側

第4招：Tree Pose
伸展位置：大腿內側
鍛煉位置：大腿
訓練：平衡、專注力

第5招：Side Angle
伸展位置：大腿內側、髖關節、腰側
鍛煉位置：大腿、腹部、手臂
柳妍熙改玩瑜伽增強柔軟度兼練氣，有助唱快歌跳舞。

第6招：Dancer Pose
伸展位置：胸部、膊頭、髖屈肌群、大腿前方
鍛煉位置：背部、臀部、大腿
訓練：平衡、專注力

第7招：Boat Pose
鍛煉位置：腹部、背部、大腿

第8招：Camel Pose
伸展位置：胸部、膊頭、大腿前方
鍛煉位置：腹部、背部、臀部、大腿

曾是短跑好手的柳妍熙（Shay）因整傷腳搞到叫停，為免傷上加傷，決定減少跑步改做瑜伽。做了半年多的她承認柔軟度比以往有進步，自爆初次跟朋友上瑜伽堂後嫌悶：「好多朋友鍾意呢個運動，第一次玩都係佢哋拉我去，上第一堂時覺得悶悶哋，因為我係好好動！不過上咗幾次就愛上呢個運動，真係幫到我好多嘢。（每次都一大班人上堂？）大家最近比較忙，如果夾到梗係一大班朋友玩最好啦！可以傾偈又可以借呢個活動聚一聚。」

挑戰擺腳上頭

問到是否靠做瑜伽練氣？Shay直認其事：「都係！呢個運動方式對我好緊要，因為以前係運動員，受咗傷之後隻腳就跑唔到，所以依家最好係做瑜伽。除咗練氣、拉筋之外，仲可以減肥。（試過高溫瑜伽？）有呀！新陳代謝快啲，減肥速度仲快咗，同埋令肢體靚啲又可以收緊肌肉，成件事係好。」她又透露昔日隨時可以擺出一字馬：「因為太耐冇做，依家真係做唔到！嚟緊會為新歌跳舞，所以呢排要勤力啲上瑜伽堂。（做唔做到將雙腳擺上頭？）暫時未得！呢個真係需要一啲時間去練，希望好快做到，係一個好大挑戰。」

做熱身免拉傷

練瑜伽經常扭來扭去，問到有否試過受傷？Shay說：「冇！不過都要小心，之前要做熱身，唔好畀啲筋咁易拉損同受傷。」至於有否男士約做瑜伽，她怕醜地說：「有……有啲男士都鍾意呢個運動，但係時間夾唔到，都係自己一個去多啲。」隨即被取笑錯過機會讓男士糾正姿勢，Shay即哈哈大笑說：「通常都係印度男老師。」