栢芝疑情緒失控永不錄用

近年轉戰內地的張栢芝，自2012年演出過電影《河東獅吼II》、《危險關係》及《影子愛人》後，近年甚少在大銀幕演出，近期參演明年賀歲片《3D封神榜》的她，在戲中反串哪吒，與古天樂及黃曉明等大鬥「戲法」。現時《封》片在內地正拍攝得如火如荼之際，豈料昨日有消息傳出栢芝扮大牌及失場，令電影公司大為不滿，怒飛栢芝出局。

栢芝前經理人及《封》片老闆之一的陳嵐，昨日接受本報電話訪問時表示，承認為此事傷心落淚：「我尊重老公永不錄用（栢芝）嘅決定，呢件事我非常心痛，我信錯人，畀咗機會佢冇好好珍惜。」她表示找栢芝演出時，身邊很多人反對，但她仍相信栢芝，皆因栢芝對她作出承諾：「當時佢同我講，『我（栢芝）會改過以前嘅嘢，做好自己。」

被指爆粗鬧製片

自言會改過的栢芝，更主動向陳嵐表示無酬拍戲，雖然栢芝尚欠電影公司片約，但對栢芝愛惜非常的陳嵐，仍封價值211萬的利是給栢芝，她說：「呢個數字係栢芝嘅Lucky Number，但佢收到利是之後，就冇簽收據或者合約。佢就話同前經理人合約糾紛為理由，所以我一直信佢。」

雖然栢芝未有簽任何文件，但電影仍繼續拍攝，而陳嵐透露農曆新年後情況已經一發不可收拾，她說：「新年前仲可以控制到，佢無啦啦去北京話要試造型，我當時仲怪製片通知錯誤，但其實冇人同佢講過，之後栢芝就冇聽電話、失場。」而陳嵐又透露栢芝為拍戲的前後次序，竟爆粗鬧製片：「佢唔鍾意製片拍咗黃曉明同古天樂先，就爆粗鬧人話：『佢哋大晒呀？我冇收片酬，係咪應該我拍先？』」其後栢芝更Send短訊給陳嵐老公，曲線明寸黃曉明：「佢同我老公講：『你哋個契仔（黃曉明）牛逼（巴閉）啦！我老公仲覆佢：『你都好牛逼啦！』當時仲以為佢讚曉明添！」但據知，栢芝為《封》片亦十分賣命，飾演哪吒的她每日吊威吔吊足十幾小時，令雙腳滿布瘀血，要到醫院放瘀血，有時更要用輪椅代步，又不幸弄傷腰及頸部。對此，陳嵐承認此事，並指有為栢芝安排替身，但栢芝堅持親身上陣。

換角搵文章頂上

面對栢芝種種失控，陳嵐表示已經不是第一次，栢芝拍攝《楊門女將之軍令如山》時已經匿在房不出來，不肯埋位拍攝，要導演陳勳奇向陳嵐打電話求救。而陳嵐透露同片的劉曉慶於日前曾對她說：「栢芝這樣的工作態度是不行的！」對於栢芝失場兼失控，陳嵐坦言要無奈換角，並已找內地演員文章頂上：「其實之前搵佢，但檔期唔啱，但我哋戲入面好多細節同動畫都做遲咗，所以佢就可以入組，多謝佢，咁遲搵佢拍都咁幫手。」最後陳嵐寄語栢芝應該盡快求醫，她說：「佢（依家）嘅情緒應該要睇醫生。（打畀佢？）我諗佢唔會再打畀我。」