「古惑佬」鄭伊健、謝天華、錢嘉樂及林曉峰與草蜢聚首於一堂，不過「四個男人三個爸」，三位慈父都懶理「江湖大事」轉講「湊仔經」，初為人父的天華更自爆在家中升職做「尿片部部長」！

蘇志威（左起）、蔡一智、蔡一傑、謝天華、鄭伊健、錢嘉樂及林曉峰聚首一堂舉行簽唱會，吸引大批粉絲捧場。

謝天華自封為「尿片部部長」，並笑言湊小朋友相當熟手。

鄭伊健、謝天華、錢嘉樂及林曉峰（阿Lo）與草蜢，昨日現身屯門時代廣場舉行《歲月友情 x BE THREE》簽唱會，雖然「古惑仔」四缺一欠陳小春，但現場仍有逾百觀眾圍觀，七個大男人在台上與粉絲大玩遊戲，並各唱一曲。

拒指腹為婚

剛榮升人父的天華笑言在湊小朋友上已相當熟手，更自封為「尿片部部長」，問他會想再追多個女？天華說：「未咁快諗，啲人成日以為我生咗好耐，問我個仔係咪半歲，其實得五個星期咋！」問到天華、嘉樂和阿Lo三人老友鬼鬼，可會指腹為婚？嘉樂即時Say No：「我哋呢個組合旺仔多啲，咁我個女咪好吃香？畀佢哋自由發揮啦！」嘉樂又表示做爸爸最難其實是頭三個月要保守秘密，因為洩漏「天機」BB會小器。

金牌贈拍檔

至於踏入出道三十周年的草蜢表示，今年會推出廣東碟和國語大碟，並會有巡迴演唱會與海外粉絲見面，問到為何不在香港開騷？三子說：「因為今年都冇時間，一個好嘅演唱會係唔可以咁草率。」蔡一智又談到一個組合維持三十年很難得，不會唱上神枱，會望着前輩譚詠麟去做，他又笑言雖然未有演唱會，但會打兩個金牌給兩位拍檔賀一賀三十周年。