歌手吳浩康（Deep）上月背女友鍾舒漫（Sherman）偷食後一直「潛水」，昨日他首度蒲頭為事件解畫，知衰的Deep承認做錯，自稱與Sherman處於緩衝期的他揚言會以行動箍煲：「點去做重要過靠把口去講。」

Deep出席慈善籃球比賽時承認與Sherman處於緩衝期。

Deep和Sherman以往經常出雙入對。

吳浩康因偷食被「女友」Sherman狠撇，「潛水」多時的他昨日出席慈善籃球比賽，問到與Sherman現時的關係？他說：「正如佢之前所講嘅緩衝期，咁分手係無限期，我哋定咗個時間，我只可以用緩衝期去講。（時間係幾耐？）呢啲留畀我地去處理。」

願承擔責任

對於被指是「溝女王」，Deep說：「擔心唔嚟，要努力面對，至於一啲過咗去、改變唔到嘅嘢，唔係我依家去探討嘅時候，會努力去Focus自己嘅每一步。」至於會否向Sherman作出承諾？Deep揚言一實勝千言：「點去做重要過靠把口去講，嚟緊要花力氣耷低頭去經營自己。（形象插水影響工作？）冇得驚，都做錯咗，係做錯事嘅代價，自己要面對番結果。」

根本冇婚期

另外，Deep強調一直有與Sherman聯絡：「有Keep Contact，多謝大家關心，我哋關係裏面需要沉澱吓，唔係唔想答。」曾自爆已向Sherman求婚的Deep說：「一直有同佢傾結婚話題，但冇一個確實婚期存在。」