昨晚舉行的慈善籌款晚宴星光熠熠,不少國際巨星應邀出席,包括金像影后桂莉芙白德露、英國名模姬摩絲、碧咸嫂Victoria、黑珍珠名模娜奧美金寶及「名媛獄女」Paris Hilton等,各人均華麗閃爆登場!而本地薑則有「大美人」劉嘉玲和關之琳,嘉玲還笑言不敵「酒魔」姬摩絲,爆對方是千杯不醉!

嘉玲自爆曾與姬摩絲對飲,但不分勝負。

姬摩絲以黑色晚裝亮相,大晒事業線,相當性感!

Victoria大晒手上的巨型鑽戒,十分風騷!

娜奧美金寶穿上紅色Deep V晚裝,十分搶鏡。

嘉玲與姬摩絲Friend爆合照,老友鬼鬼。

Paris Hilton賣口乖稱很喜歡香港!

之之笑言怕醜,不敢與眾多國際巨星合照「集郵」。

穿上藍色晚裝的桂莉芙,甫出場即成為焦點。

已於昨晚圓滿結束的慈善籌款晚宴,吸引不少國際巨星專程飛抵香港撐場,當中碧咸嫂(Victoria Beckham)身穿自家設計的純白晚裝,手上還佩戴非常搶眼的巨大鑽戒,十分風騷!她說:「好開心嚟到呢度撐場。」而金像影后桂莉芙白德露(Gwyneth Paltrow)現身會場時即成為焦點,穿上藍色Marc Jacobs晚裝的她微露纖腰,並佩戴總值超過三千萬鑽飾,性感中盡見高貴,又大讚大會落力宣揚關注愛滋病訊息。而同樣穿上Marc Jacobs棗紅色長裙的娜奧美金寶(Naomi Campbell)以心口透視設計露兩手!同場的姬摩絲(Kate Moss)則以黑色晚裝亮相,大晒事業線,襯上左手瑰麗珠寶的她非常耀眼!其後行黑地氈時不慎絆倒一下的Paris Hilton險些跌在地上,幸立即取回平衡,才免出醜,她透露喜歡穿着復古服飾,又賣口乖表示很喜歡香港!

唔怕比下去

另外,作為本地代表參與盛事的嘉玲穿上橙粉紅色晚裝裙赴會,她透露老公梁朝偉身在日本工作未能陪同出席,問到現場有不少國際女星出席,覺得誰最漂亮?她說:「我個個都好欣賞,覺得個個都靚。(會唔會同佢哋交流心得?)冇特別,想同佢哋飲番杯就真。(順道介紹你紅酒生意?)之前我有同姬摩絲飲過,佢好飲得,我哋飲咗幾個鐘,但未分勝負,今晚繼續飲過,不過應該佢贏,我依家要健康啲,早起身行山,而且佢仲後生。」她隨後還為今晚的密實衣着解說:「着衫都要睇場合,唔通要袒胸露肚,你話我應該點,着衫上我冇特別睇尺度。(唔怕被比下去?)我唔驚,我都有(胸)。」

之之怕醜唔集郵

而關之琳(之之)表示近年較少出席大型晚宴,問到是否特別悉心打扮?她笑說:「今日咁大型點都要打扮嘅。(同咁多位國際巨星比較?)個個都靚,大家都公認。(要集郵?)自己怕醜,少做呢啲嘢。」其後超性感赴會的「Ball后」薛芷倫穿上Deep V背心裙,她透露今年是躋身Ball場30周年:「我1985年喺美國返嚟,而呢條裙係15年前本地設計師鄭兆良幫我設計嘅。(身材不變?)好彩。」問到會否將過往的晚裝裙拿出來做展覽?她說:「我都希望將過去嘅衫攞嚟做展覽,通知咗個女,亦希望可做到慈善。」她又表示刻意性感亮相,為對撼國際巨星做足準備:「因為呢個Ball好有代表性,係本地數一數二Ball,而且咁多國際星,而我係代表香港嘛!」